Pu John Rotluangliana, Deputy Speaker, Mizoram chuan  ni 20 August, 2013 atangin ni thum chhung thangin a bial chhung khaw hrang hrang, Teirei, Damparengpui, Tuipuibari leh Rajiv Nagar khuate a tlawh a, khawtinah mipuiten ropui takin an lo hmuak.

Pu John Rotluangliana Deputy Speaker chuan khawtina a mah lo hmuaktu mipuite hma-ah thusawiin sawrkarin mirethei eizawnna kawnga rahbi tleu tawhten lei rem an rah ve theihna tur hi a ngaihpawimawh ber anih thu sawiin chumi atan chuan Flagship Programme NLUP hi duan chhuah a ni, a ti a; tunah hian a hlawhtlinna tam tak hmuh tur a awm tawh a ni a ti a, a bik takin Bawngvulh thlangte vangin Bawnghnute-ah kan hnianghnar tawh a, Bawnghnute atanga ei tur dang siam chhuak tura hmalak mek a ni, a ti bawk.

A sawi zelna-ah Pu John Rotluangliana chuan trade hrang hrang atang pawhin hlawhtlinna tam tak hmuh tur a awm tawh thusawiin kumin September thla chhung hian 3rd Phase leh 4th Phase (Additional) 1st Instalmet sem anih tur thu a sawi a, NLUP hi Bru lo kir leh te tan pawh a hrana ruahmanna siam mek a ni, a ti bawk.

Bialtu MLA chuan NLUP hi thatchhiat inzirtirna ni lovin taimak inzirtirna, hnathawk tura in khawhmuhna anih thu sawiin tunah hian Central sawrkarin Rs vaibelchhe 28000 min ruahman sakah a chanve vel chauh hman a nih thu a tarlang bawk.

Khaw hrang hrang a tlawhna-ah hian khawtlang hruaitute nen inkawmna hun tha tak neiin an khawtlang tana sawrkarin hmasawnna hna a thawhsakna-ah khawtlang hruaitute chuan lawmthu an sawi bawk a ni.

Pu John Rotluangliana Deputy Speaker hi Pu R.L Rintluanga Private Secretary leh Pu Lalhmunmawia Ralte, Deputy DPC, SSA Mission Mamit ten an tawiawm a ni.