1523/2023-2024

2023 Thlazing ni 15: August ni 8, 2023 aṭanga khelh ṭan Independence Day Running Football Tournament 2023 chu vawiin khan Central YLA Playground, Lawngtlaiah a hmawr bawk fel a ni a. Mizoram Legislative Assembly Deputy Speaker Pu H. Biakzaua chuan Khuallian niin a hmanpui.

He hunah hian LADC-a executive member, office holder leh MDC-te, Lawngtlai Bawrhsap Pu H. Lalhmingthanga leh sawrkar official-te, LDFA hruaitute, LDFA hnuaia club hrang hrang ai awhte leh mipui ṭhahnem tak an kal khawm a ni.

Khuallian Pu H. Biakzaua chuan Lawngtlai District Football Association (LDFA)-in Independence Day Running Football Tournament a buatsaih chu lawmawm a tih thu sawiin, tournament hlawhtlin nana Independence Day Celebration Committee, Lawngtlai District te leh club hrang hrang leh mipuite thawhpuinaah lawm thu a sawi a. Final lutte a lawmpui thu sawiin, rinawm taka intihsiakna beitute'n hnehna an chang ṭhin a, lawmman an hlawh chhuak ṭhin tih hre renga mawi taka khel tura chahin, duhsakna a hlan a ni. Infiamna chu ei zawnna tlak a nih angin sawrkar pawhin a ngai pawimawh a, industry-ah puangin, infrastructure lamah nasa takin hma a la a, ṭhalaite tan remchanna tam tak a chhawp chhuak tih sawiin, infiamna chu ruihhlo laka fihlim nan leh hrisel nana hmanraw ṭangkai tak a nih angin sum tam tak sengin tournament te pawh buatsaih ṭhin a ni, a ti a. Lawngtlai District-ah PMJVK leh scheme dang kal tlangin sports infrastructure tam tak siam a nih thu sawiin, tun hnaiah Lawngtlai Vengpuiah ₹ nuai 1,000 chuang man astro turf football ground leh Chawngteah ₹ nuai 532 man astro turf football ground siam hna thawh zawh leh hawn a nih tawh thu te, Mampuiah District Sports Complex ₹ nuai 5,000 chuang man leh Lawngtlai College Vengah Residential Sports School ₹ nuai 3,400 chuang man sak mek a nih thu te a sawi a. He'ng hmalaknate avang hian infiam mite tan a phurawmin, Lawngtlai District hmathlir pawh a eng hle a ni tiin, infiam mite pawhin hei hi chhawr ṭangkaia hma sawn nan hman zel tum turin a chah a ni.

He hun hi LDFA Treasurer Pu H. Lalmuanthanga'n a kaihruai a. LDFA ECM Tv. VL Hmangaihzuala'n hunserh hmangin, Match Commissioner-te hnen aṭangin tournament report ngaihthlak a ni a. Final match khelh zui a ni.

Independence Day Running Football Tournament 2023-ah hian LDFA hnuaia affiliated club 12 chhuakin, a zavaiin match 11 khelh a ni a. Final-ah Lawngtlai Vengpui FC leh Lawngtlai Electric Veng FC te inkhelin, Lawngtlai Electric Veng FC chuan 3-2-a hnehna changin, an champion a. Lawngtlai Vengpui FC chuan Fair Play Award dawngin, mimal chawimawinaah Lalhruaisanga, Electric Veng FC chu Best Player-ah thlan a ni a. Goal 9 thuntu George Malsawmdawngkima, College Veng FC chu Top Scorer niin, C. Lalrempuia, Electric Veng FC chu Best Goalkeeper atan thlan a ni bawk a. Champion team hian ₹ 20,000/- leh trophy dawngin, runner-up-in ₹ 10,000/- leh fair play team-in ₹ 5,000/- te an dawng a. Mimal chawimawina dawngtute hian trophy an dawng ṭheuh bawk a ni.