2803/2025-2026

Kolasib, the 6th January, 2026: Vawiin khan Kolasib Deputy Commissioner Conference Hall-ah Bialtu MLA leh Mizoram Legislative Assembly Deputy Speaker ni bawk Pu Lalfamkima hovin National Highway 306&06 siam that mek chungchang thlirletna leh sawihona neih a ni.

He hunah hian Kolasib Bawrhsap Pu Robert C. Lalhmangaiha chuan kalkhawmte lawmna thu sawiin, National Highway chhe zual lai siamthat hna chu mipuite nitin khawsakna nghawng a nih avangin ngaih pawimawh a tul thu a sawi a. Kumin a District Level meeting hmasa ber Bialtu MLA-in a hmanpui thei chu thlamuanthlak a tih thu sawiin, vawiin a an thutkhawmna pawhin rah tha tak a chhuah ngei a beisei a ni, a ti.

Deputy Speaker, Pu Lalfamkima chuan thusawiin, fur ruahtui tlak hmain thla 4 (li) vel chauh hun tha kan nei tawh a, hemi chhung hian a chak thei ang ber leh tha tak a hna thawh a ngai a ni, a ti a. Nikum fur laia kawng chhiat avanga harsatna an tawh ang kha mipuiten an tawh nawn tawh loh nan theihtawp chhuah a tul thu sawiin, vantlang lirthei leh bungraw phur lirtheite harsatna tawk lova tluang taka an tlan theih nan kawngpui siam chu a hma zawng aia ngaih pawimawh zual a ngai a ni tiin, fur ruahtui tlak hma ngei a peihfel tura tan la turin NHDCIL aiawh leh contractors kalkhawmte chu a hriattir bawk.

Meeting-ah hian NHIDCL General Manager leh Contractor te hnen atangin an hnathawh tawh chin, hmachhawp leh an harsatna te ngaihthlak a ni a. Kawng siam nana bungraw mamawh (materials) te pawh a thatawk (stock) a awm thu tarlan niin, a tul zual lai bik te chak taka thawh an tum thu an sawi bawk a ni.

Vawiin thutkhawmah hian Pu Lalrinpuia Varte SP Kolasib te leh Addl. SP Kolasib, SDO (Sadar) Kolasib, SDO (C) Kawnpui te pawh an tel a. NHIDCL leh Contractors te atangin Pu B.K. Sivastav, General Manager NHIDCL;  Project Co-ordinator J.INFRA; Engineer Balaji Company te telin, Sub-Hqrs YMA hruaitute, Joint VC aiawh, MJA aiawh leh sawrkar mi pawimawh dangte an tel bawk a ni.