2804/2025-2026

Saitual dated 6th January 2026: Vawiin chhun khan Tourism Department bultuma 'Tlaizawng Paradise' buatsaih chu Pu Lalbiakzama, Speaker, Mizoram Legislative Assembly chuan Tuivai leiah a hawng a. Tourism department Minister Pu Lalnghinglova Hmar chuan he hun hi hmanpuiin Tourism Department-a thawktute, Phuaibuang leh Luangpawn khawtlang hruaitute leh chhimtu thahnem tak an tel a. Tuivai lei bul, sangha humhalhna pawnah a vawi khatna atan 'Nghakuai chiah runpui' buatsaih nghal a ni a, mi 600 bawr velin nghakuai an chiah a ni.

Assembly Speaker Pu Lalbiakzama chuan leilung hausakna leh mawina hmanga zin mite hip thei tura Phuaibuang khua a 'Tlaizawng Paradise' buatsaih a ni chu lawmawm a tih thu a sawi a. Kan khua mawina hluta rawn tlawhtu mikhualte lawm taka dawnsawn thiam a pawimawh thu sawiin chumi tur chuan khawtlang tanrualna leh thawhhona a pawimawh thu a sawi bawk a ni.

Tourism Minister Pu Lalnghinglova Hmar chuan Tlaizawng Paradise buatsaihna hian Phuaibuang leh a chhevel khaw hrang hrang tan, zin mite kaltlangin, kawng engemaw tala hlawkna an hmuh a beisei thu a sawi a. Kan leilung hausakna humhalh chung si a zin mite hip thei tura, kan ram mawinate hman thiam deuh deuh a pawimawh thu a sawi a. Phuaibuanga 'Tlaizawng Paradise' buatsaihna hian Tourist hipna kawngah hmasawnna a thlen ngei a beisei thu sawiin Tourism department ruahmanna tihlawhtling tura khawtlang hruaitute inpekna ah lawmthu a sawi bawk a ni.

January ni 6 leh ni 7 chhunga Phuaibuanga 'Tlaizawng Paradise'  kalpui tur ah hian Tuivaia nghakuai chiah runpui bakah hian Phuaibuang khaw chhehvela puk leh tlang tlawhchhuahna hun, Adventure Tourism buatsaih a ni ang a. Zanin atang hian Phuaibuang field-ah khaw mipuite kutchhuak thil chi hrang hrang lei theih a phochhuah a ni anga, zai leh lamte entir a ni bawk ang.