3067/2023-2024

Aizawl, the 15th December, 2023: 9th Mizoram Legislative Assembly-a Deputy Speaker atana thlan Pu Lalfamkima, MLA, 05 - Kolasib Assembly Constituency chuan vawiin khan a Pisa thar Assembly House-ah a luah lut. Hemi pual hian chawhnu dar 2:30 khan Pisa thar luahluh leh hlanna hun hman a ni.

Deputy Speaker Pu Lalfamkima chuan Pathian leh bial mipuite zara tun dinhmun a thleng thei chu lawmawm a tih thu a sawi a. Sawm bik leh chhungkhat hnaivaite'n hun pawimawh tak an hmanpui theih avangin lawmthu a sawi a. Assembly Secretariat-a thawktute tawiawmna fakawm a ti a. Kalkhawmte chu ram siam that kawnga theihtawp chhuahpui tur leh finchhuah a tul hunah pawh inthlahrung hauh lova pui thin turin a sawm nghal bawk.

Thusawitu dang Food, Civil Supplies & Consumer Affairs Minister Pu B. Lalchhanzova chuan Deputy Speaker thar a lawmpui thu a sawi a. Rinawmna, taimakna, huaisenna leh ngaihtuahna fim tak seng chunga ram hmasawnna kawnga tih takzeta tanrual tlan a pawimawh thu a sawi bawk.

He hunah hian Pu Tlangdingliana'n hunserh hmangin Pisa thar hlanna hun a hmang a. Dr. Lorrain Lalpekliana Chinzah, MLA, Adviser to Chief Minister (Health & Family Welfare & Agriculture) in lawmpuina thu a sawi bawk a. Pu Lalhmahruaia Zote, Commissioner & Secretary, Mizoram Legislative Assembly Secretariat-in Deputy Speaker thar leh kalkhawmte lawmna thu sawiin thawktute inhmelhriattirna hun a hmang bawk.

Pisa thar luahluh leh hlanna hunah hian Deputy Speaker hi a nupui Pi Lalthlankimi leh a fate,   chhungkhat laina hnai leh thawhpuite'n an tawiawm a ni.