1279/2026-2027

Kolasib, 3rd July, 2026: Mizoram District Transformation Program (MDTP) hnuaia Information & Public Relations Department in Diakkawn Kolasib-a Public Information LED Display Board an siam chu nizan khan Mizoram Legislative Assembly Deputy Speaker, Pu Lalfamkima chuan khuallian niin a hawng.

 He hunah hian Kolasib Bawrhsap Pu H. Dolianbuaia chu Khualzahawm a niin, Hawnna inkhawm hi Pu Zoremmuana, District Research Officer (DRO), Kolasib chuan a kaihruai a, Pu David A. Lalhmingchhuana, District Information & Public Relations Officer (DIPRO), Kolasib hnen atangin Technical Report ngaihthlak a ni.

Khuallian Pu Lalfamkima chuan thu sawiin, sawrkar hmalakna hrang hrang leh mipuite tana thu pawimawh pho chhuahna tur LED Display Board changtlung tak bun a ni chu lawmawm a tih thu a sawi a. Kolasib district-in kawng hrang hranga hma a sawn chhoh dan te tarlangin, zirna lamah erawh kan la rualawh deuh avangin nasa zawka tan lak a ngaih thu a sawi. MPSC hnuaia hna lak thinah Kolasib atanga diltu kan la tlem thin hle chu pawi a tih thu sawiin, thalaite chu hetiang kawngah hian inelna hmachhawn ngam tur leh tan la thar turin a chah a ni.

Deputy Speaker chuan Kolasib hmasawnna tura hmalakna hrang hrangte tarlang zuiin, Venglai Bazar chu sak that tum a nih thu leh, Pangbalkawn atanga South Chhimluang pawhna kawng pawh PMGSY hnuaiah pawm fel a ni tawh a, a hna petu tur (tender) pawh tihfel thuai beisei a nih thu a sawi. Hemi bakah hian Project Veng atanga Dumlui pawhna kawng pawh siam tan mek a nih thu a sawi bawk. Mizoram Universal Healthcare Scheme chu mipuiten an hlut thiam a pawimawh thu sawiin, he scheme hian sawrkarin mipuite a ngaihsakzia leh a hmangaihzia a tilang chiang hle a ni, a ti.

Khualzahawm, Kolasib Bawrhsap Pu H. Dolianbuaia pawhin thu sawiin, he LED Display Board thar hian mipuite hnenah sawrkar hmalaknate leh thuchhuah pawimawhte a thehdarh kawngah tangkaina thui tak a neih dawn thu a sawi a. "Khawpui ti mawitu a nih rualin mipuite tana tangkai tak tur a nih avangin, a chhiat a thatah mipuite pawhin neitu thinlung pua tha taka dimdawi leh uluk taka enkawl zui turin," a chah a ni.

Technical report-a a lan danin, he LED Display Board hi Mizoram District Transformation Program (MDTP) atanga sum hmuh hmanga siam a ni a. I&PR Department project niin, Lailen Consultancy ten  an sa (install) a ni. He board hi a dung feet 10 leh a vang feet 6.3 a lian niin, sawrkar hmalakna hrang hrang leh mipuite tana thuchhuah pawimawhte thehdarh nan hman tangkai thin a ni ang.

He Public Information LED Display Board hawnna hunah hian khawtlang hruaitute leh Kolasib mipui thahnem tak an tel a ni.