5024/2025-2026

Bairabi, 27th March, 2026: Vawiin khan Zampuimanga Hall, Bairabi-ah Mizo Hmeichhe Insuihkhawm Pawl (MHIP) Sub-Headquarters, Kolasib Conference vawi 16-na chu tluang taka neih a ni a. He hun hi Mizoram Legislative Assembly Deputy Speaker Pu Lalfamkima chuan Khuallian niin a hmanpui a, Kolasib Addl. DC Pi B. Malsawmtluangi chu Khualzahawm a ni. Kumin MHIP Sub-Hqrs. Kolasib Conference thupui hi "Dikna leh rinawmna chawinun" tih a ni.

Khuallian Deputy Speaker Pu Lalfamkima chuan thu sawiin, Mizo hmeichhiate'n kawng hrang hranga hma an sawn chak thu leh, khawtlang leh sorkarah pawh dinhmun pawimawh tak tak an luah chho zel chu lawmawm a tih thu a sawi a. "Khawtlang tha, ralmuang leh ruihhlo laka fihlim kan neih theih nan chhungkua a pawimawh hmasa ber a, chumi atan chuan nu te'n tu leh fate nungchang mawi leh tha a enkawl kawngah mawhphurhna lian tak an nei a ni," a ti. Hmeichhiate chu chhungkaw innghahna an nih angin, ruihhlo dona kawngah pawh tha thlah lova hma la zel turin nute a chah a, MHIP pawhin a pawl anga ruihhlo dona kawnga ngaihtuahna an sen zual zel a pawimawh thu a tarlang bawk.

Mizoram hmasawnna tura thil pawimawh tak, a bik taka rel rawn chuang chhuak chho mek chungchang sawiin Khuallian chuan, "Hei hian kawng hrang hrangin kan ramah hmasawnna lian tak a thlen dawn a. Heng hmasawnna lo thleng turte hi tangkai leh tha taka lo dawngsawng a, hma kan sawnpui theih nan keimahni mipuite ngei pawh kan rilru leh ngaihtuahna thlenga inbuatsaih lawk a tul hle a ni," a ti. Rel a rawn luh tak avangin sumdawnna leh eizawnna kawng thar a rawn inhawng dawn a, chutih hunah chuan mitinte kawng hrang hranga inpeihsaa awm a pawimawh thu a sawi bawk.

Mipui hriselna leh khawtlang hmasawnna a inzawm tlat thu sawiin, Deputy Speaker chuan damlohna a lo thlen thulha chhungkaw tana innghahna tur sorkar scheme tha tak, Mizoram Universal Health Care Scheme tangkaina tarlangin, chhungkaw tinte ngai pawimawh a inziak lut (register) vek turin kalkhawmte chu a sawm a. MHIP chu pawl tha leh pawimawh tak a nih anga vul zel turin duhsakna a hlan nghal a ni.

Khualzahawm Pi B. Malsawmtluangi, Addl. DC pawhin thu sawiin, tunlai khawvelah hmeichhiate chuan kawng hrang hrangah hma an sawn nasa hle tih sawiin, hmeichhe dinhmun inthlak danglam chho zel chu lawmawm a tih thu a sawi a. "Politics-ah pawh VCP atanga MLA thlengin hmeichhia hmuh tur an awm ta chu hmasawnna ropui tak a ni a, Mizoram Legislative Assembly-ah ngei pawh hmeichhia pathum ngawt mai kan nei chu chhuanawm ka ti hle a ni," a ti.

Khualzahawm chuan infiamna (sports) lamah pawh boxing, football leh volleyball-ah te hmeichhiate an larsar hle tih tarlangin, "Eizawnna kawng hrang hrangah pawh mipa tih chi anga ngaih thin two-wheeler taxi, auto rickshaw leh sumo khalh thlengin hmeichhiain an ti ve thei ta a, sumdawnna kawngah pawh sa sat thlengin hmeichhia an awm ta chu a lawmawm takzet a ni," a ti bawk. Hmasawnna tur tam tak hmeichhiate'n an la neih thu tarlangin, mahni hmeichhe puite initsik lova inchawimawi tawn leh inkaitho tawn turin kalkhawmte a chah a ni.

Vawiin inkhawm hi MHIP Sub-Hqrs. Kolasib President, Pi C. Laldinpuii'n a kaihruai a. Hla sakho leh sunna hun te hman a ni a. District Legal Services Authority (DLSA) atangin mipui zirtirna (awareness program) tha tak buatsaih a nih bakah, special item hmuhnawm tak tak entir a ni bawk. He Conference-ah hian Kolasib District chhung atangin MHIP member an tel tha hle.

Nimin (March 26) lamah khan Conference pual hian Rorelna hun leh Hruaitu thar thlanna hun hman a ni tawh bawk a ni.