5025/2025-2026

Dated Serchhip, the 27th March, 2026: Vawiin khan Pu B. Lalchhanzova FCS&CA, LR&S, IPRP&S changtu Minister chuan Thenzawl Lo-Tha-Zawl Playground-a Artificial Football Turf phah tur lungphum a phum.

Minister chuan thusawiin Pathianin kan hmaah thil tha tak a daha, chu chu mihringte hian kan suangtuahnaah kan dah pha lo zawk thin a, vawiinah pawh hian kan phu loh malsawmna tam tak kan dawng a ni, a ti.

Tunlai khawvel buaina avanga tuialhthei chungchanga harsatna awm thei mai tur anga kan ngaih laiin sawrkarin theihtawpin hma a la mek reng a ni, a ti bawk.

Thenzawl leh a chhehvel khaw mipuiten he football field siam tur hi ral thlir lo a, neitu thinglung pu in vil se, tha taka hnathawh a nih theih nan thawktute lo enkawlte thleng pawhin mawh an phur a ni tih hria se a duh thu a sawi a. He thil hi awlsam tea neih theih a ni lo tih hria a, a hlutzia kan hriat a ngai a.Hmasawnna hna thawh a nihin engemaw chen khawtlangah harsatna a thlen chang a awm thin a, chungte pawh chu inhuam turin a chah a. Vawiina Artificail Football Turf siam dan tur lehkha an sem chu lo dahtha a, siam zawh a nih hunah a nih tur ang a ni em tihte thlenga lo vil zui turin mipuite a chah a ni. Mi zawng zawng huap zo ni ngei se a duh thu Pu B Lalchhanzoa chuan a sawi a. Chief Minister biala thil thleng a nih avangin kan lo tisual alawm le, tih hi a thiang lo a ni, a ti.

Minister chuan he hmun hian Thenzawl hlutna a tipung anga, tlawh chaktu an lo tam anga, Thenzawl khaw mipuite inpumkhatna a ti tha lehzual dawn a ni, a ti a. Sport hi eizawnna atana hmang tur chuan infrastucture a pawimawh rualin a infiam mite inbuatsaihna a pawimawh tel thu sawiin, “Intihsiakna mai piah lamah kan nun tihlimna tur leh insawizawina hrim hrim atana tihte pawh hi a hlu em em a ni tih hi hriat tel a ngai a ni”, a ti bawk.

Mizoram State Sports Council Secretary Pu Henry C. Lalrawnkima chuan technical report a pe a, Artificial Football Turf, Thenzawl siam nan hian Ministry of Minority Affairs, Government of India hnuaia Pradhan Mantri Jan Vikas Karyakram (PMJVK) Scheme atangin June ni 11, 2025 khan vaibelchhe 11.856 sanction dawn a ni a. Hnathawktu tur Contractor zawnna atan Open Tender chhuah a nih hnuah he hnathawk tur hian M/s Décor India, Guwahati, Assam te thlan niin, Work Order pawh ni February 24, 2026 khan pek fel an ni a, work order amount chu vaibelchhe 10.33 a nih thu a sawi.

He Project chhungah hian hna hrang hrang thawh tura ruahman a ni a. Artificial Football ground hi a dung metre 111 leh a vang metre 76-a zau tur a ni a, RCC Kerbing Wall metre 0.60-a sang a hung kual vek tur niin, Perforated pipe hmangin tui paih chhuahna siam vek a ni dawn a ni. Football Play area hi a dung metre 105 leh avang metre 70 tura ruahman niin, line pawnah free area metre 3 a awm kual vek bawk ang. Artificial Football Turf hi FIFA approved Quality 60 mm (pile height) phah tur a ni.

Football ground hi tha taka hung tur a ni dawn a, metre 2 dan zelah ban phun tur niin, a hnuai lam 0.60 metre hi brick wall a ni ang a, a chunglam 1.80 metre hi Angle iron leh Steel net hmanga hung tur a ni. Gate pathum (3) goal hnung ve veah 1.2 metre-a zau leh Pavilion hmaah 6 metre a zau dah tur a ni.

RCC Pavilion hi chhawng hnih (G+1) a sak tur niin, a dung metre 23.65 leh a vang metre 5.90-a zau a ni ang. Ground Floor-ah hian Changing Room 2 leh Toilet 2 dah niin, 1st Floor hi Pavilion atana ruahman a ni a, chair 200 vel dah theihna tur a ni ang.

Pavilion sirah RCC Gallery siam ve ve tur a ni a, Gallery hi a dung metre 225, a vang metre 6 tur a ni Ground Floor hi Parking atana ruahman niin 1st Floor hi Gallery atana ruahman a ni a, hetah hian mi 230 ve ve leng thei tura ngaih a ni.

Mipa leh Hmeichhe tana inthiarna tur Public Toilet a awm anga, PwD (Persons with Disability) te tana hman tur inthiarna 2 siam tel a ni bawk ang. Internal road/Approach-road Field panna leh a area chhung inkal pawhna kawng hi RCC-in metre 3-a zau siam vek tur a ni a. RCC Water Tank, tui litre 1,00,000 (nuai khat) leng ruahman tel a ni bawk.

He hun hi Sports & Youth Services Department Commissioner & Secretary Pu V. Lalsangliana’n a kaihruai a. Thenzawl Zone football Association Sr. Vice President Pu Thanglianchhunga leh Thenzawl South VCP Pu B. Lalremsanga ten thu an sawi bawk a ni.