1322/2026-2027

Kolasib, 7th July, 2026: Vawiin chawhma  khan Pangbalkawn ah  Community Hall leh Village Organization (VO) House hawnna leh hlo thlawhna khawl (Brush Cutter) sem chhuahna hun hman a ni a. He hun hi Mizoram Legislative Assembly Deputy Speaker, Pu Lalfamkima chuan khuallian niin a hmanpui. He inkhawm hi Pu Lalmuan Puia, Project Director (PD), DRDO chuan a kaihruai a ni.

Khuallian Pu Lalfamkima chuan thu sawiin, PMKSY hnuaia hmalaknate mipuiten an hmang tangkai chu lawmawm a tih thu a sawi a. "Hmasawnna hi thil dawn ringawt ni lovin, kan thawh chhuah leh kan hman zui a ngai a, taimak leh rinawmna hi kan dinchhuahna tur a ni," a ti. Sawrkarin kuthnathawkte leh hmasawn tumte puihna a pek thin hi hmasawnna atana kawngka pawimawh tak a nih thu sawiin, heng puihna kan dawnte hi kan taimakna nen kan kawp thiam a ngai hle a ni, a ti bawk.

Deputy Speaker chuan sawrkar puihnate chu a thlawna hmuh mai ni lova, eizawnna tihpuitlin nan leh thawhrim rah seng theih nana hmang tangkai turin mipuite a chah a. Heng sawrkar tanpuinate hi kuthnathawhnaah nasa zawka kan hman chuan, kan eizawnna a lo changkangin chhungkua leh khawtlang tan hmasawnna duhawm tak a thlen dawn a ni, a ti. Sawrkar sum dinhmun pawh a lo that chhoh ve zel avangin, mipuiten an nghahhlelh em em kawngpui siam te leh ram hmasawnna tura ruahmanna dangte pawh chak zawka kalpui tan leh a nih thu a sawi a, hei hian ram tan hmasawnna kawngro a su dawn hle a ni a ti. Khawtlang hruaitute leh mipuite pawh ram leh hnam hmasawnna hna kalpui mekah theih tawp chhuaha sawrkar thawhpui turin a ngen bawk.

He hunah hian Pu Lalmuan Puia, PD, DRDO hnen atangin vawiin a an hun hman chhan leh  lawmthusawina ngaihthlak a ni a. Hemi hnu hian Watershed Development Team (WDT) hnen atangin Technical Report ngaihthlak a ni. Report-a a lan danin, he hmalakna hi WDC-PMKSY 2.0 hnuaia thawh niin, kum 2021-2022 atang khan kalpui tan a ni a. He project hi phase pathum (Phase 1, 2, & 3)-ah then niin, tunah hian Phase 3-na kalpui mek a ni. PMKSY hnuaiah hian ram hectare 2500 biala tuam niin, a huam chhung atan hian Project Cost cheng nuai 700 ruahman a ni.

He sum cheng nuai 700 hi hlawm hrang hrangah then a ni a: Administrative cost atan 10%, Monitoring & Evaluation atan 2%, DPR buatsaih nan 1%, Training atan 3%, hnathawhna (Works) atan 47% leh, ram nei lo, kut themthiamna neite chanpual atan 15% dah a ni. Consolidation & withdrawal phase fund atan 3% dah a ni bawk a, hei hi hna sulhnu thual mam nan hman tur niin sum dawn hmabak a la ni. Project hun taka zawh a nih theih nana hma latu bialtu MLA, sawrkar leh Project Implementing Agency (PIA) te thawhhona tha takah lawmthu an sawi bawk.

He hunah hian Watershed Committee hnen atangin thusawi ngaihthlak a ni a, programme tawp lamah Subject Matter Specialist (SMS)hnen atangin lawmthu sawina  ngaihthlak a ni.