1321/2026-2027 

Dated Khawzawl, the 7th July, 2026: Vawiin chawhnu khan DC Conference Hall, Khawzawlah PHED leh Art & Culture Secretary, Special Intensive Revision puala Electoral Roll Observer ni bawk Pi Zodingpuii hovin meeting neih a ni.

He meeting hi Khawzawl DC leh District Election Officer ni bawk Pu K. Vanlalthiana'n kaihruiaiin Khawzawl district-a Special Intensive Revision kalpui tawh dan te, Draft Electoral Roll-a hming chuang zat leh ERO/AERO leh mi dang hna thawh dan te report a pe nghal a. Observer Pi Zodingpuii chuan thusawiin, Observer te chu Electoral roll-a awm tur dik tak an awm theih nan te, awm lo tur an awm lohna tura vil reng tur an nih thu a sawi a. Electoral Roll dik leh thianghlim siam tur chuan thawhhona tha tak neih a tul thu te, harsatna awm ang ang sutkian a, chinfel ngaite chinfel a nih zung zung theih nana direct taka inbiak pawh reng a tul thu a sawi a. Tun hi kan tu leh fate tan vote felfai leh thianghlim kan neihna tura hun pawimawh a ni tih hria a, chutiang tura tanrualpuiah sawrkar official te bakah political party hrang hrangte leh NGO aiawhte a sawm nghal bawk a ni.

22-Tuichang (ST) AC Draft Electoral Roll-ah hian mipa vote neizat 8,678, hmeichhia 8,869 niin, vote nei zawng zawng mi 17,547 an awm a. Gender ratio hi 1022 niin Final roll 2025 atangin kiamna hi -250 (-1.40%) a ni. Khawzawl district hi Enumeration form sem chhuak zo hmasa ber leh Digitized zo hmasa ber a ni.

He meeting-ah election official bakah pawl hrang hrang aiawha lo kal - MUP te, MHIP te, political party hrang hrang te chuan an vei zawng te, an hriatthiam loh te leh zawhfiah duh hrang hrangte an sawiho a ni.