1320/2026-2027

Aizawl, the 7th July, 2026: “Development of 4-Star or Higher Category Hotel at Tourist Lodge, Chaltlang, Aizawl, Mizoram on Design, Build, Finance, Maintain, Operate, Manage & Transfer (DBFMOMT) Basis” hnuaia Tourist Lodge, Chaltlang 4-Star aia hniam lo hotel dinna tur Concession Agreement chu vawiin khan Tourism Department, Government of Mizoram leh M/s Hotel Polo Towers Ltd., Shillong, Meghalaya-ten an ziak.

He hmalakna hi Ministry of DoNER leh Planning & Programme Implementation Department te bultan a ni a, 19th February 2024 khan Kolkata-ah Road Show neiin Mizoram sorkar chuan Tourist Lodge, Chaltlang hi hotel changtlung zawka siam a nih theih nan PPP Mode-a kalpuina tur ruahmanna a lo siam tawh a. Tihhlawhtlin a nih theih nan Ministry of DoNER hnuaia Invest India ten theihtawpin hma an lak pui a ni.

Inremna hi Chief Minister’s Office-ah ziah a ni a. State sawrkar aiawhin Pu Vanlaldina Fanai, Commissioner & Secretary, Tourism Department chuan hming a ziak a, Company aiawhin Pu Prashant Gupta, Chief Financial Officer & Whole-time Director, Hotel Polo Towers Ltd. in hming a ziak a. Dr. Lalrinchhana, Principal Adviser cum Addl. Secretary, Planning te, Tourism Department officer te, Hotel Polo Towers Ltd. aiawhte leh Invest India aiawhten an telpui.

Aizawl khawpuiah hian 4-Star emaw a aia chung emaw thlen in tha hi a la awm lo va. Mizoram hi India rama state-te zinga hetiang mikhual thlenna tha nei lo state awm chhun hi nia hriat a ni. Hei vang hian Mizoram sawrkar chuan Chaltlang Tourist Lodge tihchangtlun hi thain a hria a, hma a la ta a. Hotel Polo Towers Ltd nena inremna hi siam mah se a hmunhma hi sawrkar ta a la ni reng dawn a ni.

Sorkar duh dana Chaltlang Tourist Lodge tihchangtlunna tur hi Mizoram Public Procurement Rules, 2020 tlawhchhanin, Vanglaini leh The Times of India chanchinbuahte Advertisement tihchhuah a nih hnuah, May ni 16, 2025 khan State Procurement Portal-ah e-tender tih chhuah a ni a. Hotel Polo Towers Ltd. hi chhangtu awm chhun an ni. Endikna neih a nih hnuah an chhanna hi engkimah an tling tawk tih hmuh a ni a, agreement hi ziah pui an ni ta a ni.

Inremna ang chuan Hotel Polo Towers Ltd. hian kum 30 chhung atan DBFMOMT basis-in hna an thawk ang a, kum 10 dang tum hnih pawhsei theih a ni ang. He hotel-ah hian pindan 60 (pindan 40 danga tihlen belh theih) tal awm tura tih a ni a, darkar 24 inhawng, multi-cuisine coffee shop, specialty restaurant, lounge leh Executive Health Club (gym leh spa facility awmna) te nei ngei tura tih niin, 5-Star hotel-a hlan kai theih tura kalpui tur a ni. Inremna ziah atanga ni 45 chhungin a hmunhma hi Hotel Polo Towers Ltd. hnenah hian hlan tur a ni ang.

Hotel Polo Towers Ltd. hi India hmarchhak-a hotel company lian ber an ni a, tunah hian hotel 9 an enkawl mek a, hotel dang 7 lai hmalak mekna an nei a; chung zingah chuan Meghalaya, Tripura, Nagaland leh Indian Railways-te nena PPP project an kalpuite pawh a tel a ni. 

He Project hmang hian Aizawlah khualbuk tha leh changkang zawk, khualzinte tana hmun tha tak a siam dawn a, tualchhung mi tam tak tan eizawnna hna leh revenue tam zawk a siam chhuak dawn a ni.