3517/2022-2023

Aizawl 8th February 2023: Chuhtu awm loa thlan tlin Deputy Speaker thar Pu H.Biakzaua, Lawngtlai East bialtu MLA chuan vawiin chawhnu dar 1 khan Mizoram Legislative Assembly-a a pisa thar a luah a. He hun hi Mizoram Chief Minister Pu Zoramthanga, Speaker Pu Lalrinliana Sailo, Deputy Chief Minister Pu Tawnluia, Minister leh MLA rualten an hmanpui a ni.

Mizoram Chief Minister Pu Zoramthanga chuan Pu H.Biakzaua Deputy Speaker thlan tlin a ni chu lawmawm a tih thu a sawi a. Deputy Speaker thar chu “politics ah tawnhriat ngah tawh tak a ni a, he hna hi a tlin pawh kan ring a, a lawmawm kan ti a, kan thinlung tak takin kan lawmpui a ni”, a ti.

Mizoram Legislative Assembly Speaker Pu Lalrinliana Sailo pawhin Deputy Speaker thar a lawmpui thu sawiin “A thlamuanthlak ka ti a, duhsakna ka hlan a ni”, a ti.

Mizoram Legislative Assembly Deputy Speaker 17-na ni tura thlan tlin Pu H.Biakzaua chuan he dinhmun luah thei tura thlan tlin a nih chungchangah lawmthu a sawi a. He ni hi a tana ni chhinchhiahtlak, amah leh a chhungkuaten an hriat reng tawh tur a nih thu a sawi a ni.

Mizoram Union Territory a nih lai atanga chhiarin Pu H.Biakzaua hi Deputy Speaker 17-na a ni a, State a nih hnu atanga chhiarin Deputy Speaker 12-na a ni thung. Vawiin lawmpuina programme tawi buatsaihah hian Lairam Isua Krista Baptist Kohhran Administrative Secretary Rev. Zionvarmawia Fanchun chuan hunserh a hmang a. Mizoram Legislative Assembly a Commissioner and Secretary Pu Lalhmahruaia Zote chuan programme hi a kaihruai a ni.