3518/2022-2023
Champhai, the 8th February, 2023: Vawiin chawhnu dar 1 khan Champhai District Level Task Force for Tobacco Product chu an Chairman Pu James Lalrinchhana, District Bawrhsap hovin DC Conference Hall-ah an thukhawm. He hunah hian Anti-Tobacco Squad din thar chungchang leh Tobacco Free Educational Institution (ToFEI) chungchang rel a ni.

District Bawrhsap Pu James Lalrinchhana chuan vaihlo leh a kaihhnawih do kawngah tha thlah lova tanrual a pawimawh thu sawiin, zirna in leh a chhehvel feet 300 bial chhung leh puipunna hmunahte vaihlo leh a kaihhnawih pholan, zawrh leh meizukte danin a khap tlat thu a sawi a. Member-te chu an vahvelna apiang leh remchangahte vaihlo leh a kaihhnawihin nghawng thalo a thlen theihte leh, dan hnuaia khap anih dante tarlang tam turin a chah a ni.

Anti Tobacco Squad dinglai chu kum 2 a tlin tawh avangin member ruat thar leh a tul a, meeting chuan uluk taka a ngaihtuah hnuah Anti Tobacco Squad, Champhai District chu hetiang hian a ruat a ni:
Chairman: Deputy Commissioner
Co-Chairman: Superintendent of Police
Member Secretary: Chief Medical Officer
Member-te:
1) District Education Officer
2) District Medical Superintendent
3) Deputy Commissioner of State Tax
4) District Information & Public Relations Officer
5) Principal, Govt. Champhai College
6) Asst. Commissioner, Excise & Narcotics
7) Asst. Controller, Legal Metrology
8) Asst. Director, Food & Drugs
9) President, Sub-Hqrs YMA, Champhai
10) President, Sub-Hqrs MHIP, Champhai
11) President, MJA Champhai District
12) Pu Lalnunmawia
13) Pu Ramchullova Hlawncheu
14) Pu Lalthamawia Bolchhim
15) Pu C. Zaihmingthanga

He huna tarlan anih dan chuan Champhai District-a zirna in hrang hrang 43 te vaihlo leh a kaihhnawih awm lohna hmun, Tobacco Free Educational Institution (ToFEI) ah an inpuang tawh a; hei hi District chhunga School awm zat atanga za zela 17 (17%) bawr vel nia chhut a ni. Kumin chhung ngeia District chhunga zirna in te Tobacco Free Educational Institution a puang hman vek tura tanlak nise tih a ni bawk.

He hunah hian Cigarettes and Other Tobacco Products Act, 2003 (COTPA, 2003) chungchang zirho a ni a; dan tlawhchhanin Anti Tobacco Squad-in enfiahna leh inzirtirna kalpui thin se tih a ni a. Champhai District Level Task Force for Tobacco Product chuan District mipuite chu hriselna atana pawi tak vaihlo leh a kaihhnawih laka fihlim tum tur leh, Sawrkar hmunhma, Zirna in leh puipunna hmuna pholan leh zawrchhuah chungchanga fihlim tum theuh turin a chah a ni.