3519/2022-2023
Lunglei the 8th February 2023: Mizoram Apex Handloom & Handicraft Co-Operative Society Ltd (MAHCO) buatsaih February ni 14 2023 thleng awh tur State Handloom Expo chu vawiin chhun dar 12:00 khan Saikuti Hall Ground Floor Lungleiah Lunglei D C Pi Ramdinliani'n a hawng. Handloom Expo hawnna inkhawm hi Pu Robuanga Managing Director (MAHCO) in kaihruaiin kalkhawmte lawmna thu sawiin, Handloom Expo 2023 buatsaih nih theihna tura tha thawhtu zawng zawngte hnenah lawmthu a sawi bawk a ni.

Expo hawngtu Lunglei Bawrhsap Pi Ramdinliani chuan Handloom Expo a tel Society te chu fakawm a tih thu leh hun dangah chuan tam zawk tel thei tura ?an lak a tul thu sawiin Expo chu mipui tam zawkte hnena inphochhuahna remchang tak a nih thu sawi. Pi Ramdinliani chuan Mizo hmeichhia te hi kan kut a themthiam a, kan mit pawh a fingin a ngaihna pawh kan hre hle a ni a ti. Amaherawhchu eizawnna zau zawk leh lian zawk kalpui kan harsatna chhan chu kan kutchhuak te a quality a that tawk thin loh bakah hun kan vawng diklo a, miten an mamawh hunah te kan peih hman lo fo thin a, chuvangin hlawhtlinna lian zawk thleng thei tur chuan Quality leh kan hnathawh phung (Work Culture) kan ngaih pawimawh a ngai a ti. Tun hmaa kan Nu te kan Pi te ho kha tunlai thiamna sang zawk nei si hian kan tluklo fo a, a chhan chu uluk tak leh belhchian dawl tak tura tih neuh neuh kan peihlo thin a, kan tih liam puat ?hin avangin kan kutchhuak miten a bik takin hnamdang ten an sawisel thin a ti. Mizo in a kan mamawh piah lam National leh International thlenga an duh leh mamawh tur ang chi siamchhuah kawngah leh kan zawrh chhuah dan kalphung te pawh dawra zuar ringawt duhtawk lo a, zau zawka zawrh dan changkang zawk khawvel changkanna mila kan zir chho zel a tul tih DC Pi Ramdinliani chuan ti bawkin hetiang karah hian kan hnam tih dan diktak ang chi erawh tih danglam loh hram i tum ang u a tiin State Handloom Expo hi a hawng a, Stall hrang hrangte a tlawh kual nghal a ni.

Pu Lalrinawma Pachuau Project Manager (MAHCO) in Technical report a pek danin Handloom Expo an buatsaih chu Ministry of Textile Government of India Sponsored a nih thu leh Ministry of Textile hnuaiah Mizoramin Handloom Expo buatsaih theihna panga a neih zingah MAHCO chuan pahnih changin Saitual lamah hlawhtling taka Expo buatsaih a lo nih tawh thu a sawi. Vawiina Lunglei D.C in a hawn tak State Handloom Expo Lungleia buatsaih ah hian MAHCO hnuaia Society member 31 ten dawr hawngin Mizo Handloom kutchhuak Puanven chi leh thawmhnaw chi hrang hrang bakah Kut themthiam thil chi hrang hrangte an phochhuak a ni.