3520/2022-2023

Aizawl 8th February 2023: Vawiin chawhnu khan Social Welfare & Tribal Affairs Minister Er. Lalrinawma chuan Social Welfare & Tribal Affairs leh Women & Child Development Department te tangkawp buatsaih – State Nutri-Garden Award semna-ah khuallian niin, he hun hi Vanapa Hall-ah hman a ni.

Minister Er. Lalrinawma chuan thu sawiin Saksham Anganwadi & POSHAN Abhiyaan 2.0 mission hi August ni khat, 2022 khan Ministry of Women & Child Development chuan hmalak dan tur Guidelines a tichhuak a, he Mission hian a tum ber chu India ram puma naupanga thanthu (Stunting) tihtlem te; taksa rihna leh san zawng khaikhina zang lutuk (Wasting) tihtlem te; taksa rihna leh kum khaikhina zang lutuk (Underweight) tihtlem leh, nausen pianghlim buk zang lutuk (Low Birth Weight) tihhniam bakah nu naupai, naupawm laite leh, tleirawlte’n chaw tha an hmuh mumal loh avanga harsatna an tawh thin thisen tlakchhamna (Anaemia) tihhniam leh a laka ven a ni a ti a.

Khuallian chuan rim taka kan thawh rah hi mipuiah a lang chhuak mek a, naupang malnourished te kan nei tlem chho tial tial tial zel a, Poshan Abhiyaan hi Department pakhat hmalakna avanga hlawhtling thei a ni lo a, kan thawhpui Department hrang hrangte nena kan thawhhona te hi a ropui hle a ni tiin a sawi. Minister chuan Department hnathawhah hian a bul thut, a mipui nghen (Grassroot)-a thawkte hi in pawimawh em em a, Anganwadi Worker-te leh Helper-te hna hi a ropuiin a chhuanawm takzet a ni a ti a. Hnathawhnaah hian team work a pawimawh em em a, an thawhpui Asha, Health Worker-te mai bakah, khawtlang hruaitu mai ni lo, mipuite nena thawhhona tha neih hi a pawimawh leh zual em em a ni tiin a sawi a.

Khuallian chuan Anganwadi-ah nutri-garden hmasawnna nasa a awm thu sawiin Anganwadi Centre 1638 bawr velin Nutri-Garden an siam thei chu ropui a tih thu leh centre 606 bawr velin Nutri-garden an la nei mumal thei lo tih a sawi bawk a, a la nei lote chu nasa taka hma lak thar turin a fuih bawk a ni.

STATE Nutri-Garden Award dawngtute:
1st Prize Winner - Kolasib district, Kolasib AWC-XII, Thingdawl ICDS Project
Anganwadi Worker: Vanlalchhuangi
2nd Prize Winner - Lunglei district, Serte AWC-I, Lunglei ICDS Project
Anganwadi Worker: Lalsangluri
3rd Prize Winner - Champhai district, Ngopa AWC-II, Ngopa ICDS Project
Anganwadi Worker: K. Lalremsangi

Consolation Prize dawngtute:
Aizawl district, North Tinghmun AWC-II, Darlawn ICDS Project
Anganwadi Worker: Lalmuanpuii
Siaha district, Chakang AWC-III, Siaha ICDS Project
Anganwadi Worker: F.C.Tena

Heng bakah hian District Nutri-Garden Award mi 33 hnenah hlan an ni a. He hun hi Pu Arun Mishra, Secretary chuan a kaihruai a, Pi Zoramthangi Chhangte, Joint Director chuan Nutri-Garden Innovation Plan chungchangah presentation a pe a, Pi Lallianpuii, Director chuan he hun hi lawmthu sawiin a khar a ni.