179/2024-2025 

Hnahthial the 15th April 2024: Tunkar April ni 19 a Lok Sabha MP inthlan lo awm turah Hnahthial District-a Assembly Segment awmchhun 29-South Tuipui (ST) A/S a despatch leh receiving team-te tan vawiin khan DC Meeting Hall, Rallang tlang, Hnahthial-ah Training buatsaih a ni.

Election Officer Pu Lalbiakfela kaihhruai vawiin training-ah hian vote thlak ni a polling party-te thlah liam a, lo dawngsawng tura mawhphurhna pek ‘Despatch & Receiving team’ te tana hriattur pawimawh hrang hrang inhrilhhriatna neih a ni a, Training kaihruaitu Pu Lalbiakfela chuan April ni 18 ah polling parties te chu an kalchhuak tan dawn a ni tiin an chanvo theuhah theihtawp chhuah turin a chah.

Pi Betty Lalrinfeli, DLMT chuan kalkhawmte chu polling materials check list-te zir chiang theuh a, polling party kalchhuak tur te mamawh hrang hrang (polling materials) a kim leh kimloh enpui a, tul leh mamawh an neih apianga lo buaipui chu an hna pawimawh tak a nih thu a tarlang. Vote thlak zawha polling party-te dawnsawn kawngah fimkhur turin a chah a, tul leh pawimawh zawng zawng lo enpui tura hrilhin seal ngai awm te, signature pek ngai awm te, vote thlak laiin EVM thlak (replaced) a nih leh nihloh te uluk taka lo enpui turin a chah bawk.

South Tuipui Biala Despatch & Receiving buaipui tura ruat te hi team 4 a then an ni a, team 1 ah mi 5 zel awmin EVM handler mi 2 theuh an awm a, Strong room duty team 1 ruat an ni bawk. Pi Betty Lalrinfeli, SDC leh Pu R Vanlalruata  SDC te chu tul leh pawimawh apiang enpui turin  overall in charge ah an awm bawk a ni.