180/2024-2025 

Dated Serchhip, the 15th April, 2024: Vawiin khan 1-Mizoram (ST) Parliamentary Constituency viltu Police Observer K. Satyanarayana, IPS hovin Serchhip DC Meeting Hall-ah April 19, 2024-a Lok Sabha Inthlanpui neih tur chungchang thlir lawkna meeting neih a ni.

Pu K. Satyanarayana chuan Mizoram chu ram ralmuang, mipui mimirin dan an ngaih pawimawhna hmun a ni a, inthlanpui lo awm tur pawh harsatna awm loa tluang taka zawh fel a nih theih a beisei thu a sawi a. Mizoram chu international border a awm a nih vangin ruihhlo leh ralthuam tawlhruk awm thei lakah inven fimkhur a tul thu a sawi a. Hemi kawngah theih tawp chhuaha dan leh thupek kengkawhtu police ten tan an lak tul a tih thu a sawi a ni.

Inthlanpui felfai leh thianghlim taka neih a nih theih nan Sector Officer leh Sector Police te an bial theuh uluk taka vil turin Police Observer chuan a hrilh a. Poll day ah harsatna thleng palh theih a nih hria a, an sector duty na theuh te vil uluk turin a chah a. Inthlan a zawh tawh hnuah Strongroom venhim kawngah police ten englai mahin an tha an thlah tur a ni lo a, vote chhiar zawh a nih hma chu nitin darkar 24 chhung uluk takin an veng thin tur a ni, Police Observer chuan a ti.

DEO Pu David Lalthantluanga chuan vawiin meeting-ah hian inthlanpui hmachhawn tura Serchhip District inbuatsaih dan a sawi a. Serchhip District pum chu sector 13 ah then a nih thu te, Sector officer leh sector police in an vil reng thu te leh Polling Station 88 te tlawhchhuah leh a tul anga thuam chak an nih vek tawh thu a sawi a. Serchhip SP Pu MS Dawngkima pawhin dan leh thupek kenkawh kawngah leh venhimna kawnga an hmalakna te sawiin inthlan hmachhawn turin inbuatsaihna peihfel a nih tawh thu a sawi a ni.

Vawiin meeting-ah hian sector officer te, inthlan kaihhnawiha Nodal Officer ruat zawng zawng te leh Election official te an tel a ni.