Vawiin khan Chief Minister’s Office-ah Mizoram sawrkar hnuaia Environment, Forest & Climate Change leh Public Work Department te chuan Development Project a bikin kawngpui sial hnathawh meka Forest Clearance chungchang sawihona neiin an thukhawm.

He meeting hi Principal Secretary to Chief Minister in a kaihruai a, Addl. PCCF leh E-in-C, PWD te bakah he department pahnih a mi senior officer rual an kal kim hle.

Road Project hrang hrang - National leh State Highways, World bank, PMGSY, NLCPR, NEC leh NABARD hnuaia thawh meka Forest Clearance dinhmun an thlirho a, harsatna awm te sutkian dan tur an rel ho a ni.

Forest Conservation Act, 1980 in a phut angin Forest ram reng reng thil dang atana hman (Diversion for Non-Forestry purpose) a nih dawn chuan Central sawrkar remtihna lak hmasak a ngai a. Hetianga Forest ram divert aiah hian a siam lehna atan Compensatory Afforestation te siam a ngai a ni. Kum 1977 hmalam kha chuan Forest hi constitution a state list anih angin state te thu thu a dah a ni a, mahse 1976 constitutional amendment hnuah chuan concurrent list a dah a lo ni ta a, central phalna lak hmasak phawt a ngai ta a ni.

Sawrkar ram hmasawnna atana kawng te, Power & Electricity te siam a ngai tih hriain hetianga Forest ram thiah a nih dawn hian dan fel tak a siam chu zawm hmasak a ngai a ni.

Department pahnih te hian ram leh mipuite hmasawnna ngai pawimawh chunga environment tichhe lo zawnga kal a pawimawh thu te an sawiho a, engkim inrawn tawn zel turin thu an dah a ni.

Hetiang bawk hian Power & Electricity Department te leh Border Roads Organization te hnena sawihona neih thuai nise tih an rel tel bawk.