Nimin chawhnu dar 3 khan Champhai DC Conference Hall, Keifangtlangah District Education Committe meeting vawi 29-na neih a niin Champhai District SSA Mission 'Annual Work Plan & Budget 2016-2017' chu pawm a ni. Meeting hi Champhai District Bawrshsap Pu Vanlalngaihsaka, IAS, District Education Committe Chairman ni bawkin a kaihruai a, Committee Member-te an tel tha hle.
Champhai District Bawrhsap kaihhruai District Education Committee meeting-ah hian kum 2015-16 a Champhai District chhunga SSA Mission hmalaknate tarlan niin Committee chuan tha tawkah a ngai a. Hmalakna tarlan langsar zingah Govt Vengthlang Middle School, Champhaia District chhunga BPL/AAY hmeichhe naupangte tana Residential Hostel kalpui mek te, mipa naupang school kal lote tan bika Residential Special Training Centre, Khawzawla din te leh School awm remchanlohna, Saikhumphai naupangten zirna an chhunzawm theih nan Non-Residential Special Training Centre kalpui mek te an tel a. Report-a a lan danin nikum chhung khan Government leh Government Aided School-a zirlaibu leh Uniform a thlawna sem na turin Rs. 60,91,600 hmanral a ni bawk. Nikum chhung khan vohbik naupang (Children with special needs) te'n naupang dangte ang bawka zirna an dawn ve theih nan Asisstive Devices leh Resource Room hmanga chhawmdawlna buatsaih niin vohbik naupang 993-te enkawlna tur leh vohbik naupang zawn chhuah hna thawh na turin in Rs. 53,52,750/- hmanral a ni bawk. Heng bakah hian zirna tha leh changtlung naupangten an dawn theih nan kawng hrang hranga hmalak niin District pumah Mid Day Meal pawh tluang taka kalpui a ni.
DEC Meeting chuan kum 2016-17 chhunga hmalakna atan Project Approval Board (PAB), Government of India, in a rawtna angin cheng nuai 2,487.169 a pawm a, hei hi nikum budget aiin 1.23% in a tam zawk a ni. 2016-17 Budget bakah hian kum 2016-17 chhunga hmalak dan tur, Programme of Action (POA) leh Procurement Plan te duan fel a ni bawk. Hmalakna turah hian naupangin zirna tha an dawn theih na tur te, Training hrang hrang neih na tur te, vohbik naupangte tana hmalakna turte leh Mid-Day Meal (MDM) kalpui chhunzawmna tur bakah Government leh Government Aided School a pawl 1-8 zirlaite tana zirlaibu semna tur leh Government School zirlaite tana School uniform semna turte a tel a ni.
