Nimin khan Lunglei District-a Intensified Diarrhoea Control Fortnight (IDCF) Steering Committee hnuaia din, Monitoring Team-te chuan Lunglei District huamchhunga khaw hrang hrang te tlawh in, IDCF hman dan an endik.

IDCF hnuaia Monitoring Team-te hi team hnihah inthen in, Senior Medical Officer Dr. Lalawmpuia Chhangte chuan team khat a kaihruai a. Haulawng PHC leh a hnuaia Sub-Centre 4 – Haulawng, Mualthuam, Sekhum leh Ramlaitui te an tlawh a ni. Haulawng PHC-ah khawtlang hruaitute nena inkawmna hun hmang in, Dr. Lalawmpuia Chhangte chuan kawthalo in kum tin naupang kum nga hnuai lam za zela sawm thihna a thlen thin thu a sawi a. Central sawkar chuan ngai pawimawh in kawthalo avanga naupang thi an awm tawh lohna turin IDCF a kalpui thu a sawi. Ram changkang ni tur chuan ram mipuite an hrisel hmasak a ngai tiin, khawtlang hruaitute chu department nena thawh ho na tha nei turin a sawm nghal a ni.

Haulawng PHC leh a hnuaia Sub-Centre te chuan rualkhai zawka IDCF an kalpui theih nan, Dr Lalnunpuii, Medical Officer hmalakna in Micro-Plan siam a ni a. Micro-Plan zulzuiin Sub-Centre tinah IDCF kalpui a ni. Haulawng PHC leh a hnuaia Sub-Centre ten naupang kum nga hnuai lam 539 hnenah ORS sem in, ORS-Zinc Corner 12 siam a nih bakah school 17-ah zirlai naupangte hnenah kutsil dan dik zirtir an ni.

District Project Manager Pu PC Lalhmunsiama chuan team pahnihna a kaihruai a. Rotlang ‘E’, Leite, Hnahthial ‘N’, Thiltlang leh Pangzawl Sub-Centre te an tlawh ve thung a ni. Hnahthial area-ah naupang kum nga hnuai lam 1385 leh Pangzawl area-ah 285 naupang kum nga hnuai lam hnenah ORS sem a ni a, ORS-Zinc Corner 5 siam in, school 8-ah kutsil dan dik zirtir an ni bawk.

Monitoring Team-ah hian sawrkar official-te leh tlawmngaipawl aiawh te an tel a ni.