No.1257/2021-2022

Kolasib dated 5th July 2021: Vawiin chawhma khan Kolasib district-a sangha vulh a eizawnna tihhmasawnna tur leh thiamna thar hmanga hlawk zawk a sangha vulh kalpui dan inzirtirna ‘Training on Promotion of Freshwater Aquaculture for the Development of Fisheries and Livelihood Improvement of NEH People’ chu District Fisheries Development Office, Kolasib leh ICAR-Central Institute of Freshwater Aquaculture, Kausalyaganga, Bhubaneswar tangkawpin an buatsaih a. Dr.H.Lalthlangliana, Deputy Commissioner chu khuallian niin training hawnna hi a hmanpui a ni.

Khuallian Dr. H.Lalthlangliana, Deputy Commissioner, Kolasib chuan sangha vulhtute hmasawnna tur a DFDO, Kolasib ten hrileng kar a chawl lova an hnathawh rah hmuh tan theih a a awm chu lawmawm a tih thu a sawi a. Taimak chu hlawhtlin nana thil pawimawh tak a nih rualin thiamna leh taimakna kal kawp chuan hlawhtlin leh zualna a thlen thin thu a sawi a, training paltlangte leh training ve lote ah chuan danglamna a awm ngei ngei thin thu a sawi bawk a ni. Hrileng dona karah eitur kan tlakchham loh nan hnathawhna kawng hrang hrang chu kalpui hram hram a pawimawh thu sawiin pum ruak a hri do aiin pum puar a hri do chu a sawt zawk thu a sawi. DC chuan DFDO kaltlanga sawrkar ruahmanna tihlawhtling tur chuan tun a hamthatna dawngtute hi an pawimawh thu sawiin Sangha vulh kawngah phei chuan Kolasib chu District dangte aia Sangha vulhna tur a hmun rem tak a nih thu leh mithiam awm khawmna, ICAR leh KVK, tangkai tak a hman tur a awm thu a sawi bawk a ni. Hlawhtlinna chang ngei turin tumruhna leh teirei peihna nen bei theuh turin Sangha vulhtute chu duhsakna Kolasib DC chuan a hlan bawk a ni.

Hun kaihruaitu Pi C.Lalparmawii, DFDO, Kolasib chuan sangha chi dang aia Jayanti Rohu that biknate sawi zauna hun neiin he project hnuaia sangha vulhtu thlan chhuahte chu hlawhtlinpui tur a tumruhna nen bei ngei turin a ngen a. Pu C.Liankunga, Vice President, Sub Headquarters YMA, Kolasib pawhin thusawiin Pu Ronnie Lalrinmawia, Fishery Demonstrator-in Project kalpui dan report tlangpui a pe a, Pu Hmingthanzuala, DIPRO-in he hun hi a hmanpui bawk a ni.

'Demonstration in Aquaculture for Carp Culture Project 2020-21' hi August-September 2020 khan kalpui tan a ni a, Kolasib district-ah sangha chi tha, Jayanti Rohu vulh chhoh tanna tur a hmalakna a ni. He project kalpuina atan hian Cheng nuai 9.5 vel sen niin sangha vulhtu thlanchhuahte hnenah hian Jayanti Rahu sangha chi, sangha chaw, Sangha chaw siamna (Pellitizer & Grinder), Lime, Nursery drag net, Water pump leh hmanraw hrang hrang semchhuah nghal a ni bawk.