No.1256/2021-2022

Aizawl the 5th July, 2021 : Vawiin khan Covid-19 hripui leng avanga school hawn theih a nih loh chhunga zirna kalpui dan tur rawtna leh kaihhruaina siamtu Committee-ten an rawtna School Education Minister Pu Lalchhandama Ralte hnenah an thehlut.

Minister chuan Covid-19 avangin hun rei tak zirna pangngai kalpui hleih theih a ni lova, Online class kan neih theih dante a inchen lo em em tih sawiin khairual taka zirna kalpui dan tur kaihhruaina leh rawtna a hun takah a siamtu Committee ten an thehlut chu lawmawm a tih thu a sawi a. He rawtna hi a rang thei ang bera hman a nih theih nan enzui nghal a ni dawn a ni a ti. Online class han neih hian internet nei tha lo thingtlang kilkhawr tak takah an awm nual mai a, zaa 50% bawr zetin online class hi an chhim thei lo tih te hriat a ni a, online class nei theite nen khairual nan thingtlang hmun thenkhat VLTF ten an phalnaah chuan regular-a class kal tawh mai a tha em tih te ngaihtuah ngai nia a hriat thu a sawi.

He committee hi Pu L. Thangmawia, MLA & Vice Chairman, HRD Board kaihhruaina hnuaia din a ni a. School Education Department hnuaia officers hrang hrang te bakah zirtirtu aiawhte leh ICT lam mithiamte an tel bawk. Covid-19 hri len chhunga zirna kalpui dan turah state pumpuia sikul zawng zawngten an zawm tur Inkaihhruaina – Guidelines for Education during prevalence of Covid-19 Pandemic - siam a ni a. He guidelines kalpui tur hian Department awmsa bakah State Level Committee leh Local Committee siam tura rawt a ni.

Guidelines hi Ministry of Education, Govt. of India in Inkaihhruaina a siam (PRAGYATA) behchhana siam a ni a, Mizoram zirna mil turin her rem a ni. Inkaihhruaina chi hrang hrang Online, Partially Online leh Offline-a zirna kalpui dan tura inkaihhruainate siam a ni a. Zirtirtu, nu leh pa, zirlai leh sorkar mawhphurhna hrang hrangte tarlan a ni bawk. He rawtna leh kaihhruaina siam nan hian DEO leh SDEO office behchhanin survey pawh neih a ni a, hrileng hian zirlai nuai 3 bawr vel a nghawng nia chhut a ni.

SOP thar ber milin zirlaite tel lova zirtirtute sikul kaltir rawt a ni a, a kalphung chipchiar tur chu Department lamin a duang chhunzawm ang. YMA kumpuan 'Zirna Uar Kum' a lo nih bawk avangin hri len chhunga zirna kalpui tur hian YMA te nen zau zawka thawhhona neih theih beisei a ni.

Hri len chhunga zirna kalpui nan hian sikul hrang hrangin sum an mamawh belh phuhruk nana Special provision siam tura rawtna siam a ni bawk. Heng rawtnate leh Inkaihhruiana duante hi a tul anga sorkarin a pawm chuan hman chhunzawm nghal tur a ni dawn a ni.