Pu SBK Singh, IPS, Director General of Police (DGP), Mizoram chuan vawiin khan Serchhip rawn tlawhin Serchhip SP Conference Hall-ah Police Samellan a hmanpui a, Police te chu tha taka an hna an thawh theih nan an taksa vawng uluk turin a chah.

Mizoram DGP hi R. Sahiyasundaram, IPS, Serchhip SP leh a thawhpui ten lo dawngsawngin Serchhip SP Confererence Hall-a Police Samellan neih chu a hmanpui a, Mizoram Police-ah thawktu indaihlohna nasa tak a awm thu sawiin, hemi sukiang tur hian Chief Minister hova hmalak a nih thu leh kumin chhungin thawktu lak belh tum anih thu a sawi. Quarters leh lirtheia harsatna awm mek chin fel nan Ministry of Home Affairs-ah Rs. vaibelchhe 367 vel dil niin, hmuh theih ngei beisei a nih thu a sawi bawk.Police te chu ram tana an theihna zawng zawng nena hna thawk turin an hriselna ngaipawimawh turin a fuih a, in sawizawi uar a, zu leh ruihhlo dang laka inthiar fihlim turin a chah bawk.

Hemi hnu hian Serchhip District NGO Coordination Committee hruaitute kawmin NGO te nen thawhhona tha tak an nei chu lawmawm a tih thu a sawi a, hetianga thawhhona tha an neih hi chhawm nun zel nise a duh thu a sawi a ni. Pu R. Sanghmingthanga, NGO Coordination Committee Chairman chuan Mizoram DGP in Serchhip a tlawh chu lawmawm a tih thu a sawi a, NGO te leh Police te chuan thawhhona tha tak an nei tih sawiin, Dan leh thupek kenkawh a that zel theih nan Serchhip Bazar-ah CCTV Camera tam zawk bun tul an tih thu te, Serchhip Bazar-a Police Beat Post chu hmun remchang leh mipui tana pan awlsam zawkah dah nise an duh thu leh Khawhai atanga Chhingchhip panna kawng chu khawchhak lam atanga Dan lova thil rawn phurhluhna kawng nia a lan avangin helai hmunah hian Police Check Post siam tul an tih thu te an lo thlen a. Heng an thil thlen te hi a theih anga lo ngaihtuah zui a nih tur thu DGP chuan a sawi a ni.

Hemi hnu hian Serchhip Police Station tlawhin Serchhip SP, R. Sathiyasundaram, IPS hmalakna hnuaia Serchhip Police Station, Serchhip Bazar leh Serchhip Sailiamkawn-a CCTV Camera bun thar chu DGP hian a hawng a, Serchhip Police Station-ah hian CCTV camera 6 bun niin Serchhip Bazar-ah 4 leh Sailiamkawn-ah 3 bun a ni a, heng CCTV bun thar te hi tangkai taka hman zui a nih a beisei thu DGP chuan a sawi bawk.

DGP hian Serchhip Police Station building tlawhkualin Lock-Up leh thawktute awmna hmun te a tlawh a, DGP hi Serchhip SP, R. Sathiyasundaram, IPS leh Addl. SP, PC. Laltanpuia ten an tawiawm a ni.