Vawiin chawhma khan ASEAN ram zinga ram paruk aiawh Ambassador te chuan Governor P.S. Sreedharan Pillai an kawm a. Inkawmna an neih zawhah Governor chuan ASEAN ram palaite pualin Banquet Hall, Raj Bhavan-ah chawhchhun a buatsaih nghal a ni.

Governor P.S. Sreedharan Pillai leh Lady Governor Reetha Sreedharan te chuan Mizoram mipuite aiawhin ASEAN palaite chu Mizoram an rawn tlawh avangin lawmthu an hrilh a. Mizorama an cham chhungin hunt tha tak an neih an beisei bakah sumdawnna kawngah pawh Mizoram pawimawhna te an rawn hmuchhuah ngei an beisei tih an sawi a. Governor chuan ASEAN palaite nena an inkawmna chungchang leh an ngaihdante chu President leh Prime Minister hnenah pawh la thlen a tum a. ASEAN palaite rawn zinna avang hian Mizoram kaltlanga ASEAN ram te leh India insumdawntawnna a punchhoh bakah inlaichinnate pawh a ngheh zual sauh a beisei a ni a ti.

ASEAN Ambassador te hian anmahni thil tawn theuh te leh Mizoram an hmuhdan te Governor hnenah hian an sawi a. Mizoram nuam an tih thu te, MIzo mipui khawsak phung, incheina, ei leh in bakah Mizo lam leh Kut te chu ASEAN rammite tihdan nen pawh inang hlein an hriat thu pawh an sawi a ni. An cham chhungin Chief Minister Pu Zoramthanga an hmuh thu te, Chief Secretary Pu Lalnunmawia Chuaungo leh Senior Official te pawh an kawm thu an sawi a. Indo-Myanmar Border Area an tlawh thu te sawiin an ngaihdan leh hmuhdan chuan Mizoram chu ASEAN ram leh India ram insumdawntawnna atana State pawimawh tak a ni tih an hmuhchian thu an sawi bawk a ni.

Vawiina ASEAN ram palai rual te hi H.E. Mr Bounneme Chouanghom, Laos’ Ambassador to India chuan a rawn ho a; member dangte chu - HE Mr Moe Kyaw Aung, Ambassador of Myanmar, HE Dato Paduka Sidek Ali, Ambassador of Brunei, HE Mr Ung Sean, Ambassador of Cambodia, HE Mr Sidharo Reza Suryodipuro, Ambassador of Indonesia leh HE Mr Pham Sanh Chau, Ambassador of Vietnam an ni a. A tiring Ambassador 7 an lo kal a; March 7 khan H.E. Mr Ramon S. Batagsing Jr, Ambassador to Phillipines chuan Official thilah Delhi a lo pan hmasak avangin vawiinah Governor kawmnaah hian a tel ve thei lo a ni.