3875/2022-2023
Mamit 16th March, 2023 : Pu Devesh Chandra Srivastva, IPS, DGP (M) chuan vawiin khan 4th IR Battalion Commandant Office building thar, Mamit Luangpawl ami chu khuallian niin a hawng.

Khuallian chuan 4th IR Bn. Commandant Office building thar a hawng thei chu lawmawm a tih thu sawiin Office tha ber ni turin duhsakna a hlan a. Police te'n Sports lama theihna nasa tak kan neih chu vawngnung zel a, inlak fit chhunzawm zel turin a chah. Harsatna an neihte an hotute hnena thlen thin tura chahin ruihtheihthil laka fihlim turin Battalion-a thawkte chu a chah bawk.

Police te chu chhungkaw member vek kan nih angin kawng engkimah inpuitawn tur kan ni tiin Police nupui intelkhawm, Mizoram Police Wife Welfare Association (MPWWA) te pawhin mawhphurhna sang tak kan nei a. Ruihtheihthil laka kan fihlim thei dawn lo anih chuan kan hna thlengin a tuar thei dawn tih hrerengin fihlim turin a chah a ni.

He hun khualzahawm ni-a hmanpuitu Pu Laldinpuia Tlau, CJM Mamit chuan 4th IR te chu remna leh muanna a awm theih nana Sorkarin a khekkhal an nih thu sawiin a tul huna che chhuak thei tura an nun uluk turin leh Fit tak leh hrisel taka awm turin a chah a ni.

Technical Cell, PHQ report tarlan danin Commandant Office 4th IR Bn. Luangpawl sakna atan hian ? 1, 17,45,753/- hman niin Contractor hi Pu Ngurzamlova, Class I Contractor a ni a. Ni 28.02.2020-ah a sak hna hi tan niin Ni 21.02.2023-ah sak zawh a ni. A building zau zawng hi Ground Floor 16.80m X 16.80m = 282.24 sqm leh Basement Floor 16.80m X 12.60m = 211.68 sqm a ni.

He hun hi Pu K.L. Vulmawia, Commandant, 4th IR Bn. chuan kaihruaiin Pu Lalpianthanga, Dy. Commandant, 4th IR Bn. chuan kalkhawmte hnena lawmthu sawina a nei a. Special Items hrang hrang neih zui niin tlaiah chawhlui kilho nghal a ni bawk.