2879/2023-2024

LUNGLEI;the 29th  November, 2023: Vawiin chawhnu  khan Mizoram Director General of Police Pu Anil Shukla IPS chuan Lunglei Police Station chhawng khatna thawmthat hna thawh zawh tawh leh Lunglei District Police leh mipuiten  internet khawvel tangkai leh zuala an hman tur WhatsApp Chatbot a hawng. He chatbot hi awlsam tea mipuite'n police an biakpawh theihna tur atana siam niin hei bakah hian Lunglei District Police official Facebook handle siamthar pawh a hawng nghal bawk a ni. WhatsApp Chatbot hi Freshworks, Delhi te nena tangkawpa siam niin mipuite'n awlsam lehzuala police nena an inbiakpawh zung zung theihna tura siam a ni a. Police hnena thu thlen duh hrang hrang, entirnan, tualthah, pawngsual, rukruk, adt. awlsam taka thlen theihna tur hmanraw tangkai tak tur a ni. Chutihrualin, Lunglei Police Facebook page ah hian police leh dan leh hrai kaihhnawih thu thar leh thil thleng hrang hrang chhiar theih tura chhawp chhuah thin a ni dawn a, khawtlang mipui leh police te'n zai khata sual do kawnga ke an pen ho theihna tur hmanrua a ni dawn a ni.

Hawnna inkhawm hi SP Conference Hall -ah neih niin; Pi Zomuanpuii SDPO,Lunglei chuan a  kaihruai a.  DGP Pu Anil Shukla  IPS chuan Police station mawitak mipuite tlawh chaka siam ani hi lawmawm a tih  thu leh, hetianga hmunhma tha an neih theih nana hma latu zawng zawngte chungah lawmthu sawiin; tangkai thei ang bera hman a nih theih nan duhsakna a hlan bawk.

Lunglei Police te hi mipuiin min ring ngam se tupawh he Police Station-ah hian tlangnel taka an lo luh ngam  nan inbuatsaih turin a chah  hlawm. Lunglei hi Drugs leh zu laka khawpui fihlim ni tura hmalak a ngaih thu sawiin; VDP nena thawhhona tha nei a,  kan tu leh faten ruihlo laka an fihlim theih nan hmalak a ngaih thu a sawi bawk. DGP chuan Lunglei District Police ten harsatna an neih te chu a hriatpui thu sawiin; Sorkar tharah theitawp a hmalak anih tur thu a tarlang bawk a ni.

kumina Lunglei khawpui a VDP, Zu leh Ruihhlo man kawnga thawktha  ber Chanmari VDP te hnenah lawmman pek a ni a, Lunglei District police chhunga zu leh ruihhlo man kawnga police thawhhlawk berte chawimawina pek an ni bawk a, ASI Zothansanga DSB, HC Vanlalthuama DSB, C/163 F. Lalhruaitluanga Lunglei PS leh C/227 HC Vanlalchhuanga Lunglei PS te hnathawhthat azarah kumin 2023 chhung khan zu leh ruihhlo case 11 ziahluh niin; zu bottle 218, zu litre 184, Beer cane 4, buhzu litre 30 (Zu leh Damdawi an man te hi  RS 4,25,890/- man hu a ni)  leh Heroin No.4, 472.9009 grams a vaiin cheng 17,84,800 man hu an man a ni.

He hunah hian Pu H. Ramthlengliana, IPS, DIG Southern Range leh Pu Rahul Alwal IPS te pawhin thu an sawi a, Superintendent of Police Pu Rahul Alwal  IPS chuan lawmthu sawiin "A taka hmuh theih changkanna hmunhma tha neih kawnga kan hmalakna te leh technology tangkai lehzuala hmang tura kan hmalak nate hi Lunglei District Police tan chuan hmasawnna ropui tak a ni a, min hmuhpui tura DGP Mizoram a lo kal hi kan lawm takzeta, a kaihhruaina hnuaia changkanna leh hmasawnna kawng nasa lehzual a zawh zel kan tum a ni" a ti.

Mizom DGP Pu Anil Shukla hian SP office leh  2nd Bn MAP Luangmual te tlawhin an hmunhma leh Pisa te a fang kual a, thawktute chuan an duh leh mamawh te a hnenah an lo thlen bawk a ni.