2880/2023-2024

Dated Siaha 29th November 2023 : Vawiin chawhnu khan Pu Lalhmunsanga Hnamte, District Election Officer, Siaha, kaihhruaina hnuaiah Mizoram MLA inthlanpui vote chhiar ni a hriattur pawimawh sawihona DRDO Conference Hall-ah neih a ni a. He hunah hian 39-Saiha (ST) A/C leh 40-Palak (ST) A/C- a Returning Officer -te bakah Political Party aiawh te an telkim vek thei a ni.

Pu Lalhmunsanga Hnamte, DEO chuan NGO-Co-ordination Committee -ten vote chhiar ni sawn turin ECI lamah hma an la mek a, chutih rualin ECI- in vote chhiar ni tura a lo ruat tawh December ni 3 -a vote chhiar turin engkim peihfel tawh a ni, a ti a. 39-Saiha (ST) leh 40-Palak (ST) Assembly Constitency-a vote tla te chu Government Siaha College-ah chhiar anih tur thu a sawi. 39-Saiha (ST) A/C-a vote tla chu Ground Floor, 1st Semester room-ah chhiar tur niin 40-Palak (ST) A/C- a vote tla te chu Seminar Hall-ah chhiar a ni bawk ang a ti. 39-Saiha (ST) A/C tan hian dawhkan- 8 siam niin, 40-Palak (ST) A/C tan hian dawhkan -9 siam a ni bawk a. Vote hi Round- 5 ah ve ve chhiar zawhfel tura ruahman a ni tih a sawi.

Postal Ballot- a vote tla chhiar turin dawhkan hran siam niin, 39-Saiha (ST) A/C tan dawhkan pahnih leh 40-Palak (ST) A/C tan dawhkan pakhat siam a nih thu District Election Officer- chuan a sawi a. Voter Verifiable Paper Audit Trial (VVPAT) slip chhiar tel tur niin, RO ten Polling Station panga lehkha hmangin an pawt ang a, chuta an pawh Polling Station- a VVPAT slip chu dawhkan hranah chhiar a ni ang a ti bawk. Postal Ballot-a vote tla te chhiar hmasak ber a ni ang a, Postal ballot- chhiar a nih atanga darkar chanve hnuah EVM- a vote tla te chu chhiar tan a nih tur thu sawiin, Counting table- ah hian Polling Station serial number indawt danin chhiar a ni ang a ti.

Pu Lalhmunsanga Hnamte chuan Room pawimawh tak tak pathum-Room No:1- Communication Room, Room No:2- Media Centre Room leh Room No :3- Public Communication Room-a awm dawn tih a sawi a. Room No:1 hi official te tan niin Room No:2 chu candidate leh an agent- te tan a ni ang a ti. Counting Hall- ah hian ECI atanga Counting Observer lo kal bakah RO emaw ARO- te bak chuan phone ken luh phal a ni lo tih a sawi a. Vote chhiar fel a nih atanga ni 30 chhung ngeiin 'Return of Expenditure' thehluh a tul tih tarlangin, candidate leh an agent te chuan lo ngaipawimawh turin a ngen nghal bawk.

Pu Lalhmunsanga Hnamte chuan vote chhiar chu zing dar 8 atanga tan a nih tur thu sawiin, political party- te thawhpuina tha tak hnuaiah felfai leh thianghlim takin vote thlak fel a lo ni tawh a, Ralmuang leh felfai taka vote chhiar a nih theih nan Political party -te chu thawhpuiah sawmin Political party-te duhsakna sang ber a hlan nghal bawk.

Pi Marilyn Rualzakhumthangi, Returning Officer, 40-Palak (ST) A/C leh Pi Lalnunmawii, Returning Officer, 39- Saiha (ST) A/C -te pawhin thusawina neiin, Pi B. Malsawmtluangi, Asst.Returning Officer 39-Saiha (ST) A/C chuan power point presentation hmangin vote chhiar ni a hriat tur pawimawh sawifiahna leh zirtirna a nei a. Zawhna leh chhanna hun hman nghal a ni bawk.