330/2023-2024

Champhai, the 4th May, 2023: Director-General of Police (DGP), Mizoram Pu Devesh Chandra Srivastva, IPS chuan vawiin chawhnu dar 1 khan zanhnih cham turin Champhai a thleng. DGP hian Champhai Police Station leh SP Office tlawhin a enfiah a; Police Station Conference Hall-ah Police, Police Wife, VC leh VDP te kawmna hun a hmang a. Mizoram Police Khualbuk, Champhai Vengsang Police Complex ami a hawng nghal bawk.

Pu Devesh Chandra Srivastva chuan ramri depa awm Champhai District Police-te kaltlanga dan lova thil tih ven leh man chhuah kawnga hlawhtlinna hriathlawh tak, ruihhlo leh nungcha tawlh lian tham tak takte man a ni thin chu fakawm a tih thu sawiin, District ramri international boundary kilometre 160 dawna thui chu awlsam taka luh leh chhuah theih a nih avangin ruihhlo leh dan lova ramri kaltlanga thiltihte do kawngah lungrual taka hmalak a tul takzet a ni, a ti a. Pawikhawihna thleng hrang hrangah thubuai ziah luh tam hreh lo turin a chah a; hnu chhui hmanhmawh luata tihsual palh a awm loh nana fimkhur tur leh taima turtein a chah a, Line department dangte nena tanho thiam leh inpawhtlan a pawimawh thu pawh a sawi bawk. Ruihhlo that lohzia nasa zawka inzirtir a tul thu tarlangin, VDP, VC leh NGO te chu khawtlang nuam leh ralmuang siam kawnga Police-te hmalakna thlawpa tawiawm tlat zel turin a sawm nghal bawk.

Director-General of Police chuan ram mawi leh ralmuang tak Mizoram tichhe theite do kawngah tanrual a tul thu sawiin, Police force lama indaihlohna awmte leh hmeichhe Police awm belh ngaihnate pawh a tul anga ngaihtuah zel tum a ni, a ti a. MLA General Election a hnaih tawh thu sawiin, Police-te chu awnlam neilo, mahni duty-te tha taka hlentu nih tum zel turin a fuih a. Champhai District huam chhungah border crossing point 23 dawn a awm avangin dan lova thiltih ven kawngah tualchhung mite nena thawhho thiam a pawimawh thu leh VDP te tha tichaka, tun aia tam zawk dina tanhopui thiam a tul thu a sawi a. Thenawm ram buai avanga raltlante chu ram Dan siamte tha taka zawm tura zirtir tam tur leh, dan an zawm em tihte ngun taka chik turtein a chah a. Traffic Management hmalakna fakawm a tih thu sawiin, intuaithar zel a tul thu leh hemi kawngah hian hmathar lak tum a nih thu a sawi bawk.

He huna Champhai SP Pu Lalrinpuia Varte tarlan danin Champhai District chuan Indo-Myanmar border kilometre 160 bawr vela thui neiin, Border pillar 3; BP 26, 27 leh 28 te a awm a. Champhai District-ah Sub-Division 1, Police Station 3 leh Beat Post 1 a awm bakah Immigration Check Post 1 tiamin Police Checkgate 3 a awm a. Beat Area hmun 15 siam niin, khaw 20 ahte Village Defence Party (VDP) kalpui mek a ni. Heng bakah hian 2nd Assam Rifles & 42nd Assam Rifles te khaw 7 ah an awm bawk. Champhai DEF hnuaiah hian thawktu 130 an awm mek a ni.

Kumin January atanga April thla chhung khan  Champhai District chhung Police Station 3 ahte case 65 (Champhai PS 49, Zokhawthar PS 9 leh Dungtlang PS 7) ziahluh a ni a. Case ziahluh zawng zawng atanga chhuta za zela 34 hi ND&PS kaihhnawih niin, za zela 34 dangte chu chhan hrang hrang vangte a ni a, za zela 22 chu rukruk case niin, a dang za zela 6 chu burglary case a ni. Pawikhawihna thleng avanga man za zela 18 te hi ram dang mi an ni, za zela 82 dangte chu India khua leh tuite an ni. Kumin kum bul atanga April thla zawh thleng khan Heroin (no 4) Kg 7.5, Methamphetamine Kg 2.2 leh Kuhva rah Kg 67,540 an man bawk.

Inrawnkhawmna hun Police Station Conference Hall-a neih hi Pu Lalmalsawma Hnamte, Addl. SP Champhai chuan kaihruaiin Pu Lalrinpuia Varte, SP Champhaiin powerpoint presentation kaltlangin Champhai DEF report tlangpui a pe a. SDPO Champhai Pu Gaurav Tyagi, IPS in lawmthu sawiin hun hman hi a khar a ni.

Vawiin tlai dar 5 khan DGP Pu Devesh Chandra Srivastva chuan Zokhawthar a tlawh a; Police Check Gate leh Police Station-te tlawhin a enfiah a. Zokhawthar Assam Rifles tlawhin OC Maj Asha Ram leh a thawhpuite'n an lo dawngsawng a, sipai hotute a kawm a ni.