329/2023-2024

Vawiin khan Mizoram Home Commissioner Pu H.Lalengmawia chuan a pisaah Mizorama tlawmngai pawl hrang hrang te, sawrkar hotute leh Mizoram chhunga Manipuri te aiawh All Mizoram Manipuri Association (AMMA) hruaitute a kawm.

Manipur-ah Zohnahthlak hnam hrang hrangte leh Meitei te inkarah harsatna tun hnaiah a thleng chho mek a. Mizoram atangin Manipura lehkhazir leh hnathawka awm mek te engemawzat an awm bakah Zohnahthlak Manipur-a cheng te harsatna tawh mek hi Mizoram Sawrkar chuan a hriatpui a. Sawrkar leh sawrkar inbe tawnin he harsatna chinfel a nih a, Manipur-ah remna leh muanna a awm theih nan leh Zofate himna turin Sawrkar chuan hma a la a. Hemi chungchangah hian vawiin khan Home Commissioner chuan a pisaah MZP, CYMA, MUP leh Home Department hotulute a titi pui a ni.

Home Commissioner Pu H.Lalengmawia chuan All Mizoram Manipuri Association (AMMA) hruaitute pawh a pisaah a kawm a. Mizoram chhunga Meitei te an himna turin sawrkarin hma a la tih  hriattirin District tina DC leh SP te pawh  thil duhawm lo a thlen loh nan hma la turin a hriattir tawh tih a sawi a. Meitei te chu Mizoramah thlamuang taka awm turin a hrilh a ni.