328/2023-2024

Vawiin khan Mizoram Sawrkar, Home Department chuan Manipur-a thil thleng mek chungchangah hetiang hian thuchhuah a siam.

Mizoram State thenawm, Manipur-a tualchhung buaina awm mek chu Mizoram sawrkarin pawi a ti hle a. He buaina avanga Manipur chhunga Zohnahthlak te tawrhna pawh Mizoram Sawrkarin a hria a. He buaina avanga harsatna tawk mek Zohnahthlak te himna turin Mizoram sawrkar chuan theihtawpin hma a la nghal a.

Mizoram Chief Minister Pu Zoramthanga chuan May ni 4, 2023 zingkarah Manipur Chief Minister Pu N. Biren Singh be nghalin, tunlaia Manipur a buaina awm hrim hrim hi tireha, boruak muanawm siam tura hma la turin leh a bik takin Manipur chhunga cheng Zohnahthlak te himna leh tribal an nih anga hmathatna hrang hrang an neih mek te ti tlem zawnga hmalakna awmlo turin a ngen nghal bawk a ni.

He inbiakna avang hian Mizoram leh Manipur Chief Minister te hian Joint Statement tihchhuah thuai an tum nghe nghe a ni. Tin, Union Home Minister Pu Amit Shah pawh Chief Minister Pu Zoramthanga hian be bawkin, Pu Amit Shah hian buaina a reh theih nan a tul anga hmalak a Io tiamin Central Paramilitary Force te pawh thawn luh belh thuai an nih tur thu a Io hrilh a.

Manipur buaina hi a reh thuai Mizoram Sawrkar chuan a beisei a. He buaina avanga harsatna tawk Zohnahthlak te a hre reng bawk. He buaina avang hian Mizo mipuite chu he buaina tipunlun zawnga hmalakna awm reng reng dodal turin a ngen nghal bawk a ni.

Mizorama cheng hnamdang / Meitei te pawh thlamuang taka awm turin a ngen a, he buaina hi a hma thei ang bera tihreh a nih theih nan anmahni zawn a hma la turin a ngen tel bawk a ni. Tin, Mizoram Sawrkar chuan Mizoram chhunga hnamdang / Meitei awm te pawh Sawrkarin an himna a ngaihtuahin hma a la a ni tih hre tur leh ring tawk turin a chah bawk a ni.

Hemi chungchang hi Home Minister, Mizoram ho in uluk taka vil leh ngaihchan reng a ni e.