327/2023-2024

Lunglei the 4th May, 2023 - Vawiin chawhnu khan Lunglei District Swachh Bharat Mission (Gramin) chu an Chairman Lunglei DC Pi Ramdinliani, IAS kaihhruaiin Lunglei DC Conference Hall-ah an thukhawm.

Lunglei District huamchhunga thlingtlang khua te ODF (open defecation free) Plus an nih theihna tura hmalak tul te, Line Department-te nena hmalak tlan zel dan tur te leh Plastic Waste Management chungchang te sawiho a ni.

Lunglei DC Pi Ramdinliani chuan hmasawnna daih rei leh tlo nei tur chuan faina leh thianghlimna a pawimawh hmasa a ni tiin Lunglei District huamchhunga thlingtlang khua te ODF (open defecation free) Plus an nih ve thuai theihnan member-te theihtawp chhuah a, hma la turin a chah a. Sawrkar hmalaknate chak zawka a kal zel theihnan Department ten kan hnathawh theuh kan in hriat pui a, a theihna apiangah Convergence in Scheme leh project te kan kalpui a tul takzet a ni tiin SBM(Gramin) hmalakna ah pawh Line Department-te tha taka hma la tlang turin a hriattir a ni.

Er K. Zohmingliana, SE Lunglei WATSAN Circle Office, Lunglei chuan Lunglei District huamchhunga Swachh Bharat Mission (Gramin) hmalakna kal mekte sawifiahna hun a hmang a. SBM (G) hian component pali – ODF Sustainabo;oty, Solid Waste Management, Liquid Waste Management leh Faecal Sludge Management te a huam a. SBM (G) hnuaiah hian Lunglei District-ah thingtlang khua 134 a awm mekin Lunglei District in ODF Plus Village ala nei ve lo a. Tun dinhmunah Mizoram chhungah ODF Plus village 246 an awm tawh a ni. He hmalakna hi Convergence a kalpui tur niin sum za zela sawm sarih (70%) chu SBM (G) in tum in, za zela sawm thum (30%) chu 15th Finance Commission atangin a ni.

Lunglei District-a thingtlang khuate ODF Plus an nih ngei theihna tur leh he Scheme in a phut ang ngeia VC ten hma an lak theihna tura hmalak dan tur rel ho a ni a. SBM (G) hmalakna vil tur hian Block tinah Block Coordinator ruat ni se tih Committee chuan a rel a. ODF Plus Verification Team pawh siam fel nghal niin Block tinah BDO te Team Leader a ruat niin PHE, H&FW Department aiawhte ruat tel an ni. SBM (G) hmalaknate eGramswaraj Portal ah a hun taka update thuai a nih thin theihnan PHE leh LAD Department te chu hma lo la tlang tura hriattir an ni bawk.