2760/2025-2026

Aizawl, the 22nd December 2025: Vawiin khan Mizo Diaspora Cell, Chief Minister Office chuan Media platform hrang hrang Influencer thenkhatte CM Conference Hall-ah thingpui an inpui a. Chief  Minister Pu Lalduhoma pawhin a telpui a. Diaspora Cell hmalakna a lo chak zawk theihna tur te, zau zawka puanzar a nih theihna tur te leh hmalakna tura thil tha nia an hriatte an sawipui.

Chief Minister Pu Lalduhoma chuan, ram danga kan thalaite hnathawka an chhuak hi a lawmawm a, vak chhuak pawh hi tam deuh deuh se kan duh. Chutihlaiin, dan lova mi an vah chhuah hian an va awmna rama harsatna an tawhin sorkar an rawn bel lo thei lova, in lakchhuah a har tawh thin si a. Dan ang taka an kal zel hi kan duh ber. Chu mi kawngah chuan kan theih tawpin hma kan la a, nangni kan influencer te, kan youtuber te hian awareness lamah min lo pui ve thin ula kan duh a ni, a ti.

Pu Vanlaldina Fanai, Chairman, Diaspora Cell pawhin Diaspora Cell din chhante a tarlang a, influencer lian ten Diaspora Cell hmalaknaa an thawhpui theihna leh an tangkainate a sawi a, an thawhpuina a ngen a ni.

Pu Raymond Lalmuana, Member Secretary chuan Diaspora Cell hmalak tawhnate a tarlang thung.

Kal khawmte hian sorkar thawhpui an inhuam thu an sawi a, a tul anga inbiakpawh zui zel ni se, an ti.

Mizo Diaspora Cell hian influencer thenkhat, Chrismas hmanga lo haw te hun remchang zawngin chawpchilh deuh takin thingpui inhona hi a buatsaih a, hei hi a bul tanna a ni. Accredited Journalist te, kohhran thalai leh social media lama mi hlawhtling dangte pawh la sawm zel an tum a ni.