Central Hindi Training Institute (CHTI), Agra leh Distirct Institute of Education & Training (DIET), Aizawl te tangkawp buatsaih Pre-Service Teacher Education (PSTE) IInd Yr. Trainees tan ‘Hindi Refresher Course’ chu vawiin khan DIET Auditorium, Chaltlang-ah Education Minister Pu Lalsawta’n a hawng.

Ni 21 chhung awh tur he Refresher Course hawngtu Pu Lalsawta chuan Zofate zingah zirlaite tuipui leh manthiam zawngin Hindi zir bul kan lo tan thiam tawk loh avang khan tuina tak tak an tlachham thin nia a hriat thu leh tun dinhmunah erawh chuan zirna kalphung changkang zawk hmangin zirlaite tuichilh zawnga Hindi zir kan thiam chho ta mek a ni, a ti. Hindi hi khawvel pum huap pawha tawng lar leh tangkai a nih tawh avangin khawvel sorkar lian ber a ngaih America meuh pawhin Hindi zirturin tan a lak mek a ni, a ti a. Chuvangin tun tuma hetiang intuaihriamna hun buatsaih a nih hi thil tangkai leh Mizoram zirna bikah nghawng tha tak chhuah tur a ni ngei ang, a ti bawk.

Thusawitu dang Prof. Sushila Thomas, HoD, CHTI chuan tawng, sakhua leh nunphung ze hrang hrang India ram tipumkhattu chu Hindi a ni tiin hnam inpumkhatna chungchang thlir ngawt pawhin he rama cheng mipui tam zawkte hian Hindi kan thiam a tul a ni, a ti.

Central Hindi Training Institute hi Ministry of Human Resources Development hnuaia awm a ni a, rampum huap tana Hindi zirna zawng zawng khaikhawmtu a ni. CHTI hian state hrang hrangah hetiang programme hi a kalpui thin a ni. Mizorama an rawn neih vawi khatna a ni nghe nghe a, May ni 21 atangin June ni 7, 2013 thleng a awh ang. PSTE Trainees hi zirtirtu hna zawng mekte tana lo inzir lawkna a ni a, tunah hian hetiang training nei mek mi 280 an awm mek a ni.