Bamboo Development Agency (BDA) leh United Nations Industrial Development Organisation (UNIDO) tangkawp chuan tangkai zawk leh eizawnna atana chhawrnaawm zawka Mau hman anih theina turin, Dt. 15th -20th May, 2013 chhung khan ‘Development of Prototype Products’ training chu Sesawng-ah a buatsaih a. He training-ah hian mau hmanga eizawng thin (artisan) mi 20 thlanchhuah an niin, heng mite training pe hian Guwahati atangin mithiam an lo kal a ni. Training-ah hian thiamthil hrang hrang magazine rack, bamboo basket, bamboo lamp shades, etc. te siam zirtir an ni.

BDA leh UNIDO tangkawp hian mipui te’n mau hmanga eizawnna ngialnghet an neihna turin training vawi 3 an pek na a ni ta a. Mau hmang a jewelry and ornaments (tlereuh) siam leh mau hmanga thiamthil hrang hrang-ah training an lo buatsaih tawh a ni. Heng training avang hian local market-ah mau hmanga siam thil tha tak tak lei theih turin phochhuah an nih phah a ni.

UNIDO hian Hmarchhak State panga (5) ah mipui te’n nun phung changkang zawk leh eizawnna ngial nghet zawk an neih theihna turin hma an la mek a. Heng state panga atang hian thawhpui (partner) nei zelin, Mizoram-ah chuan Bamboo Development Agency (BDA) hi an thawhpui a ni a. BDA hi Mizoram Sawrkar hnuaia Industries Department-ah din niin, mau hman tangkaina kawngah nasa tak hma la tu a ni.

He training kharna hun hi nimin, Dt 20th May, 2013, (Thawhtanni) dar 2:00 pm khan hman a ni a, Pu PC Lallawmsanga, IPS; Principal Secretary, Industry Department leh Executive Director, BDA ni bawk chuan khuallian niin a hman pui a ni. Khuallian hian trainee te chu rinawm a, taima taka thawk chhunzawm zel turin a fuih a, inelrelna tel lo va inhlawmkhawm in, cluster anga hma la chhunzawm zel turin a fuih bawk. Training zawng zawng te hi certificate leh bamboo tools kit tha tak pek vek an ni. UNIDO atangin Pi Manjula Saikia Bhuyan, National Consultant and Project Expert pawh he programme hmang tur hian Guwahati atangin a lokal bawk a ni.