Cheng vaibelchhe 10 senga sak Principal Accountant General Office Building chu luah theih turin Mizoram Larsap Pu Vakkom Purushothaman chuan vawiin khan a hawng. Building thar hawnna puala inkhawm Principal Accountant General Pu L. Tochhawng kaihhruaiah hian Governor chuan Office building thar hawnna sathliah ni mai lovin sawrkar kalphungah rahbi thar pawimawh leh kan boruak tawn zel milin kaihruaitu pawimawh tak kan chuang kai ni a ni, a ti. Accountant General hnathawh hi mipui sum enkawl leh a hmanna tur diktaka hman anih chungchanga vengtu pawimawh an ni a, chu chuan sawrkar dik fel leh fai langtlang a siam thin a ni, a ti. Dan siamtu (Legislature) leh sawrkar hnathawk(Executive) te inkara thawktu pawimawh an nih angin an pathum hian mipui rinhlawh khawpa sum leh pai khawihtu pawimawh ber an ni.Sawrkar sumpai enkawlte, hman dan endik leh khuahkhirh thlenga Accountant General hnathawh hi sawrkar inrelbawlna leh hmasawnna hnathawk kawng hrang hrangah tehfung pawimawh tak a ni, a ti.

Mizoram Larsap chuan Secretariat bul hnaia he building sakna tur hmun petu Mizoram sawrkar chungah leh a sakna sum ruahman saktu sawrkar laipui chungah lawmthu sawiin Principal Accountant General leh a thawhpuite thahnemngaihna a fak, inpekna thukzawk nen hna thawk zui turin a sawm nghal a ni.

Hawnna inkhawmah hian Pu H.Liansailova, Finance Minister, Pu S.Hiato, PHE Minister, Pu N.K.Chakma, AH & Vety Minister, Pu PP Thawlla, MLA leh Central leh Mizoram sorkar hnuaia officers thahnem tak an tel a ni. He building hi 4400Sq.m.-a zau niin ruahtui khawlna tuizem leh pianphunga rualbanlote tan vahvelna(ramp) siam a ni. June ni 15, 2007 khan Pu L.Tochhawng chu Accountant General hmasa ber atan dah a ni a, tunah hian staff 117 an awm a ni.