Vawiin khan District Institute of Education and Training (DIET), Lawngtlai chuan Central YLA Hall, Lawngtlaiah In-Service Teachers Education (ISTE) 2nd Batch Graduation Day an hmang a. Lawngtlai Bawrhsap Dr Arun T., IAS chuan a hmanpui. 

Lawngtlai DC chuan zirtirtute chu mihring nun siamtu, Pathian dawt chiaha ngaih an ni thin a, DIET atanga training chhuakte paw'n zirtir hna pawimawhzia chu hre reng se a duh thu a sawi a.  Hmun dang aiin Lawngtlai District-ah chona a tam zawk tih sawiin, an hna chu rawngbawlna pawimawh ber a ni tih hre turin a chah. Zirna a that phawt chuan hmasawnna hna dang pawh a tha mai a ni tiin, zirna kawnga District chawi kangtu nih ngei tum turin zirtirtu training chhuakte chu a fuih a. DIET Magazine 2017 a tlangzarh nghal bawk. 

Vawiin Graduation programme-ah hian DIET Lawngtlai Principal Pi Ngur Hming Liani Chinzah chuan kal khawmte lawmna thu a sawi a. PSTE 1st Semester zirlai Marina Lalrintluangi'n hunserh hmangin, zai leh lam te ngaihthlak leh thlir ho niin, khawnvar chhit leh thutiam lakna hun hman a ni a. Zirlai chhuakte atanga thu sawi ngaihthlak a nih bakah, DIET Lecturer Pu N. Ramfangzauva chuan lawm thu sawiin, hun khar a ni. 

DIET Lawngtlai hnuaiah hian zirtirtu thawk laite tana training (ISTE) batch 2 an chhuahna a ni a. Hemi rual hian ISTE hi a tawp nghal dawn a. Kumin hian primary school zirtirtu 19 leh middle school zirtirtu 110, an vaiin mi 129 an graduate a. Vawiin hian lawmman leh certificate sem chhuah nghal a ni.