Vawiin khan District Institute of Education and Training (DIET), Lawngtlai chuan Lawngtlai DC Conference Hall-ah Lawngtlai District-in zirna leh thiamna lama hma a sawn theihna tura hma lak dan tur zir hona (seminar on challenges in education & literacy for Lawngtlai District) an buatsaih a. Lawngtlai DC Dr A. Muthamma, Programme Advisory Committee (PAC) Chairman chuan a hmanpui.

Dr A. Muthamma chuan state leh district council-a official-te District hmasawnna tur ngaihtuaha hmun khata an kal khawm chu thil lawmawm tak a ni, a ti a. District chhunga zirna kawnga harsatna hrang hrang awmte su kiang turin theihtawp chhuaha tan ho a tul a, naupang sikul kal lo leh sikul bang tihniam tur leh sikul kaltir leh tura hma lak chu tih tur pawimawh hmasa a ni tiin, chumi atan chuan sawrkar hna thawk, tlawmngai pawl leh nu leh pate thawh hona tha tak neih a pawimawh thu a sawi.

He hun hi DIET Principal Pi Ngur Hming Liani Chinzah, Programme Advisory Committee (PAC) Secretary chuan a kaihruai a. Zirna lama Lawngtlai District-in hma a sawn theihna tur ngaihtuah chu seminar-in a tum ber a nih thu sawiin, seminar atanga hma lak ngaihna lai lo langte chu a taka a hlawhtlin theih nana bawhzui nghal zel a nih tur thu a sawi bawk.

He seminar-ah hian state, LADC leh CADC-a zirna lama dinhmun pawimawh tak tak chelhtute an kal khawm a. Mi thiam tak takte paper buatsaih zir ho niin, District chhung zirna dinhmun leh harsatna tawh mek te, hma lakna tur leh hmasawn theih dan tur te ngaihtuah hova sawi ho a ni.