December ni 15, 2016-a Mara Autonomous District council chhunga Village Council pariat-a By-Election neih turah State Election Commission chuan inthlan vuakveta political party leh candidate-te zawm turin Model Code of Conduct a puang a, November ni 16 atanga December ni 20, 2016 chhung a huam ang.

By-Election neihna tur Village Council pariat ah te hian hemi hun chhung hian :-

1) State Election Commission phalna tel lo chuan Sorkar Department hrang hrang leh Public Undertaking Corporations-ah hna lak emaw appointment thar inpek emaw khap a ni. Hei hian State Public Service Commission in thlan te tih loh, written test, personal interview leh candidate selection process dangte a huap a ni.

2) Heng V/C area huamchhunga Sorkar hnathawkte transfer leh posting tih danglam phal a nilo. By-Election neih tur puan hmaa transfer order lo chhuak tawhte a huam lovang.

3) Sorkar inrelbawlnaa indaihloh avanga transfer loh theihloh thilah Department ten State Election Commission chu transfer an mamawh chhan sawifiahna nen a phalna an dil thei ang.

Model Code of Conduct kalpui anih chhung hian MADC area huamchhunga Sorkar hnathawk – State, Autonomous District Council, Central Sorkar hnuaia thawk emaw, Public Sector Enterprises hnuaiah leh Sorkar atanga puihna hmu Statutory Body hnuaia thawk reng reng chu Code of Conduct hian a huam tel bawk ang a. Law and Order hna thawk Police-te chu candidate meeting-a tela ngaih anni lovang.