Vawiin khan District Institute of Education & Training (DIET), Lawngtlaiah Pre-Service Teacher Education (PSTE) trainee-te tan India Constitution-a Sixth Schedule chungchang zir hona (seminar) buatsaih a ni.

He hun hi DIET Lecturer Pi Janet Zonunmawii Hauhnar chuan a kaihruai a. PSTE trainee Carolyn Lalruatfeli'n hunserh a hmang. Resource Person Pu Laldinpuia Tlau, Chief Judicial Magistrate chuan India Constitution-a Sixth Schedule awmzia leh chumi hnuaia Autonomous District Council dinhmun a sawi fiah a. India ram chu dan lalna ram a ni a, dan chunga leng tu mah an awm lo va, dan hnuaiah eng kim dik taka tih a tul a ni tih sawiin, dan chu mahni duh zawnga hrilhfiah mai lova a nihna tak zu hriat fiah tuma beih a pawimawh a ni, a ti.

He seminar-ah hian Lawngtlai District Information & Public Relations Officer Pu C.Lalhruaitluanga leh Govt Lawngtlai College-a Asst Professor Pu R.Lalthankima te paw'n zirlaite fuihna thu an sawi a. Zawhna leh chhanna hun hlawkthlak tak hman ho niin, PSTE trainee-te'n an hriat fiah loh an zawhte chu resource person-in fiah takin a chhang a. PSTE trainee V.Lalengvara'n lawm thu sawiin, hun khar a ni.

DIET Lawngtlai hi kum 2005 khan kalpui tan a ni a. Tun dinhmunah PSTE hi seat 51 a awm mek a. Semester 4 (kum 2) zir tur niin, tunah hian 2nd Semester a kal mek a. Seminar hi syllabus-a tel a nih anga buatsaih a ni. PSTE bakah hian In-Service Teacher Education (ISTE) training pawh kalpui mek niin, 2015-17 batch-te'n vawiin khan kaa chhan exam (viva voce) an bei ve bawk.