Mizorama cham mek Pi Rekha Sharma, National Commission for Women (NCW) Member chuan vawiin khan Chief Secretary Pu Lalmalsawma, IAS chu a pisaah a hmu in, Mizoram hmeichhe dinhmun, a bik takin jail tang hmeichhiate dinhmun tihhmasawn nana tul nia a hriatte a sawipui. Hemi chungchangah hian DIG Pu Thianghlima Pachuau, IPS leh police hotu dangte pawh DIG pisaah a kawm bawk. Pi Rekha Sharma hian chawhma lam khan Mizoram University-a School of Social Sciences hnuaia zirlai hmeichhiate nen inkawmna hun a nei bawk a ni. 

Pi Rekha Sharma chuan zirlai te bulah chuan Mizo hmeichhiate chu India state dang ngaihtuahin an dinhmun a tha viau nia a hriat thu leh lawmawm a tih thu a sawi a. Hmeichhiate himna atan Dan hrang hrang siamte chu zau zawk leh chiang zawka inhrilhhriat zel theih ni se a tih thu sawiin, chutihrual chuan mahni hamthatna atan Dan hmansual tumna awmlo tura a duh thu a sawi bawk. Pi Rekha Sharma chuan zirlaite zawhna hrang hrang chhangin, National Commission for Women hnathawh dan tlangpui a sawi bawk a, India hmarchhak hmeichhiaten harsatna an tawh changa lo buaipui turin a bika cell siam a nih thu te a tarlang bawk. Pi Rekha Sharma chuan he hun, Dean's Conference Hall, School of Social Sciences-a buatsaihah hian Department of Public Administration, MZU in "Administrative Studies - A National Refereed Annual Journal" an siam chu a tlangzarh nghal a ni. 

NCW Member chuan MZU VC Prof. Lianzela nen inkawmna hun a neih bakah Womens' Studies Centre tlawhin an hotute nen inkawmna hun a nei bawk a. An centre tihchangtlun kawnga harsatna an tawhte ngaihthlak sakin, a theihna kawngah chuan hmalakpui a tum thu a hrilh a ni. UGC-Womens' Studies Centre hi May ni 12, 2016 khan Mizoram University-ah a ding tan a. He centre hmalakna zingah hian hmeichhiate chungchang zirna lama' resources' pek te, workshop leh seminar buatsaih te leh NGO, Centre, scholar leh department hrang hrang inkara inpawhna tha tak siam te a tel a ni.