Vawiin khan District Institute of Education & Training (DIET), Lawngtlaia zirlaite chuan September ni 5-a Zirtirtute Ni (Teachers' Day) lo thleng tur pualin a thlawnin thisen an pe.

DIET Lecturer Pu Ramfangzauva'n hun kaihruaiin, DIET Trainers' Union-in Teachers' Day puala thisen pek runpui an buatsaih chu lawmawm a tih thu a sawi a. Association for Voluntary Blood Donation (AVBD), Lawngtlai President Pu Elvis Lalthangzuala chuan AVBD Lawngtlaiin a thlawna thisen pek lama rawngbawl hna an thawh dan te sawiin, thisen pek hi mi dangte tana malsawmna kan nih theihna kawng tha tak a ni, a ti a. Lawngtlai khawpui chunga damdawi in pathum te'n Blood Bank pakhat an intawm avangin thisen mamawhna a sangin, thisen pek lama tan lak a ngai hle a ni, a ti a. DIET-a zirlaite chu a thlawna  thisen pek uar deuh deuh tur leh mi dangte zirtirtu nih tum turin a chah a ni.

DIET Lawngtlai hian kum 2016 atang khan kum tin thisen pek runpui an buatsaih thin a. Kumin pawh hian Teachers' Day 2019 pualin Voluntary Blood Donation Camp hi buatsaih lehin, thisen unit 24 an pe a. Thisen petute hi hmeichhia 6 leh mipa 18 an ni a. Lawngtlai District Blood Bank-a thawkte'n DIET building-ah kal chilhin thisen hi an laksak a ni.