Vawiin chawhnu khan Pachhunga University College ah Computer Application Centre hawnna hun hman a ni a, Dr R Lalthangliana, Higher & Technical Education Minister chuan Khuallian niin a hmanpui.

Minister Dr R Lalthangliana chuan Pachhunga University College chu Mizoram chhunga college hrang hrang zinga National Assessment and Accreditation Council hnuaia endiknaa titha ber an ni te leh University result hrang hranga tithazual zinga PUC zirlaite an thahnem thin chu lawmawm a tih thu a sawi a, hna hrang hrang lakna a thiamna phut tel fo ni ta Computer Application zirna college zirlaite tan College campus ngeia hawn a ni ta chu lawmawm a tih thu a sawi bawk a ni. Dr R Lalthangliana chuan,’Khawvel changkanna ina a ken tel, Computer Application chu kan nitin hnathawhnaah kawng hrang hrangin kan hmang chho ta zel a, zirlai pangai piah lamah hna kan zawnna leh thawhna kawngahte a pawimawh chho mek zel a ni,’ a ti a,’College degree piah lama Computer Application zirna indawng tel thei tur hi a ropuiin hmalakna pawimawh tak a ni,’ a ti bawk. Minister chuan Pachhunga University College a Computer Application Centre tih changtlun kawnga a tul apiangah hma a lakpui thin tur thu a sawi bawk a ni.  

Vawiin Computer Application Centre hawnna hun hi Dr Tawnenga, Principal PUC in a kaihruaia, Dr LP Lalduhawma, Course Coordinator & Mathematics Head of Department in report a pe a, Dr Vanlalthlana, MLA te leh PUC teaching leh non-teaching faculty te bakah zirlai thahnem takin he hun hi an hmanpui bawk a ni.

PUC Computer Application Centre ah hian Diploma in Computer Application-I (DCA-1) certificate course zirna kalpui a ni dawn a,  batch hmasa ber atan hian zirlai 64 lak an ni.