Vawiin hian Pi Sangchhin Chinzah, Serchhip Bawrhsap chuan a pisaah Rashtriya Poshan Maah (National Nutrition Month) 2019, Serchhip district a hawnga, District Level Convergence Committee on Poshan Abhiyan te thukhawm nghalin Poshan Month hman chhunga hmalak dan tur chi hrang hrangte an rel nghal.

Chairman Pi Sangchhin Chinzah chuan, National Nutrition Month chu National Nutrition Missions (Poshan Abhiyan) hmalakna peng pakhat a nih thusawiin, Poshan Abhiyan chu India sawrkar Flagship Programme pakhat, naupang te, nu naupai mek te leh hnute hne lai fa nei mekten ei tur tha an hmuh theihna hmalakna a ni a, he Mission hi March 2018 khan hawn a ni, a ti a. Nutrition Month hman chhunga Action Plan duan te tha taka kalpui a nih ngei theih nan member te inbuatsaih turin a ngen nghal a ni. Kal khawmte hian National Nutrition Month thutiam sawi rualna an nei nghal a ni.

Poshan Maah hawng pah hian District Level Convergence Committee neih zui nghal a ni a, Pu Lalbiakliana, CDPO Serchhip Circle chuan Poshan Maah chu September thla chhunga hman tur a nih thute, tlema district lama an hawn tlai deuh chhan te leh thil pawimawh dangte a sawifiah a, Nutrition Month chhunga hapta tina tih tur leh hmalak dan tur ruahmanna te pharhin Committee chuan a ngaihtuah zui a. Vawiinah a hawnna neih ni mah se hmalakna thenkhat chu thla tir atanga kalpui tan a nih thute a sawi lang a ni. Hapta tina hmalak turte hi member department hrang hrangte nena thawh ho tur niin mawhphurhna hrang hrangte siam fel nghal a ni.

District Level Committee hian Block Level atanga kum 2019-20 chhunga  hmalak dan tur action plan lo lut pawh thlir nghalin an ruahmanna te chu pawm sak an ni hlawm a, district level atanga lo chin fel theih loh thil, thuneitu sang zawk hnena thlen chite erawh chu thuneitu sang zawkah thlen an rel a ni.

Meeting ah hian member department te an tel tha hle a ni.

Attachment

  • Loading attachment...