730/2022-2023
Aizawl, 1st June, 2022 : Chief Minister Pu Zoramthanga chuan tukin khan DIET, Chaltlang peng (Chaltlang to Ramhlun North) kawng siamthat thar chu a hawng.

Chief Minister chuan Aizawl khawpui chhunga kawng pawimawh tak pakhat siamtha a hman theih a hawn a ni ta chu lawmawm a ti a. Hmasawn belhna tur, siamthat ngai leh hmalakna tur tam tak Aizawl chhungah ringawt pawh a awm thu sawiin, zirchiang a, kan zavai tana tangkai zual zawka hman dan, chei that leh siamthat dan te ngaihtuah tha a tih thu a sawi.

Chief Minister chuan heng hmachhawp siamte hi a hlawhtlinna atan hmathlir (vision) tha neih a pawimawh thu a sawi a. A hlawhtlinna vawiina kan hmuh nghal loh avangin a hlawhchham tihna ni lovin, hmachhawp kan siamte hi hun rei lote a thawh zawh theih te, thawh hun chhung rei zawk ngai leh a hlawhtlinna hmu tur chuan kum tam tak chhung nghah ngaite a awm thin tih hre chungin, rilru nghet tak pu a thawh a pawimawh thu a sawi. Chief Minister chuan hmathlir tha tak a awm tawh chuan hun tam tak kal mahse a hlawhtlin hun a la thlen tur thu leh thangthar lo la awm turte tan ram nuam kan hnutchhiah tur thu a sawi a. Tlachawp taka rorel a thil tih hian khuareiah thil buaithlak tak tak, siamthat hautak si a thlen theih thin avangin ram hmasawnna chungchangah chuan hmathlir tha neih tlan pawimawh a tih thu a sawi.

PWD Engineer-in-Chief Er. Bowman chuan tukin kawng hawn puala inkhawm tawi buatsaih chu a kaihruai a. Superintendent Engineer, Central Circle Er. Vanlalngheta chuan technical report pe in Chaltlang khawtlang hruaitu atanga thusawi tawi ngaihthlak a ni bawk.

Technical Report: Vawiina kawng hawn tak hi a project hmingah “Improvement of Chaltlang to Ramhlun North road via DIET” tih vuahin, estimate cost chu Rs 237.91 lakhs (Rs. 80.96 lakh (UD&PA Department) + Rs 103.82 lacs (PWD) + Rs 53.13 lacs (Additional) a ni a. UD&PA Department kal tlangin sum Rs 80.96 lakhs ruahmanna awm atanga kawng laih zauh leh a grade siam tha tura kawng rut hniam (Lowering) te, kawng chhuat (Pavement) siam that leh V-Shape Side drain siam tura ruahman a ni a. He hna hi Ni 02.11.2021 atangin thawh tan a ni a, a hna hi hmanhmawh taka thawh zung zung ngai a nih avangin Spot Quotation leh Departmental work-a thawh an ni a. Hna thawh tan a nih dawn lai hian ngaihtuahna thar leh ruahman tawh aia changtlung leh tha zawka siam belh leh tih danglam a ni ta zel a. A tan tirha pawisa ruahman sa bakah Rs 103.82 lakhs SEDP atanga dah belhin hna hi thawh chhoh zel a ni a. Heng sum ruahmante bakah hian a la daih lohna Additional Estimate Rs 53.13 lakhs siam belh leh niin, heng sum ruahmanna atang hian hna hi Dt 28.04.2022 khan thawh zawh a ni ta a ni. He Improvement of Chaltlang to Ramhlun North Road via DIET in a huam hna thawh peng hrang hrangte chu hetiang hi an ni.

1) Formation work (widening and lowering)
a) Length = 320.00 m
b) Width = 8.00 m
2. Pavement:
a) Width 6.500 m
b) GSB = 150mm thick
c) WBM Gr-Il 100mm & Gr-III 75mm = 175 mm thick
d) Coldmix = 20mm thickness and Seal Coat

3. Construction of Retaining Walls = 8 Nos 4. Construction of RCC Frame Retaining Wall = 2 No.
5. Construction of Masonry Side Drain with cover = 320.00 Rm
6. Construction of Cross Drain with cover = 1 No
7. Construction of RCC Balcony = 60.00 Rm