729/2022-2023
Siaha; the 1st June,2022: Vawiin chawhma dar 10:30Am atang khan DRDA Conference Hall-ah Village Level SEPD Committee member te tan Training on Family Oriented SEDP buatsaih a ni a.Training hawnna inkhawm tawi hi Pu Abraham Beirazi Khithie,PD DRDA leh Member Secretary District Level SEDP Committee ni bawk chuan a kaihruai a ni.

Pu Lalsangliana, District Bawrhsap leh Chairman District Level SEDP Committee ni bawk chuan training hawnna thu sawiin, MADC Election avangin district dang te aiin SEDP beneficiaries thlanna kawngah hma la tlai hret mah i la, VC te leh mipui ten min tawiawm that avangin, district dang te hnu khawiah Siaha district hi kan awm hauh lovang. Village Level SEDP Committee ten in tihtur theuh lo ti zung zung u la, District Level SEDP committee pawhin kan lo bawhzui zung zung dawn ni a. Sorkar hian policy leh scheme hrang hrang a lo duang tawh thin a, kan hlawhtlinpui leh hlawhtlinpui lo te pawh a awm nuk thin. Kan lo hlawhtlinpui tawk lo policy leh scheme-ah te khan sorkar leh official te chauhvin mawh kan phur bik lo, kan za vai hian mawh kan phur tlang vek a ni, tih erawh i hre thar leh ang u. Chuvangin hun kal ta a kan hlawhchhamna te atangin inzir thiam i la, tun tum chu district dang te khum veka hlawhtlinpui theuh kan tum dawn ni a. Vawiin training hi uluk takin ngaithla u la, bel taka thiam vek intum dawn ni a. Hriat chian loh a awm pawhin trainer te zawh hre reng reng lo tur a ni, tiin Trainees te fuihna thu a sawi.

Pu Sangliana chuan Beneficiaries thlanna kawngah hian Village Level SEDP Committee hi in thu hle a, chuvangin District Level Committee chuan mi dik leh rinawm, tanpuina dawn chhan hlawhtlinpuia, leirem rahpuitu tur ngei in thlan chhuah ngei a beisei tlat a ni, a ti bawk.

Vawiin Training-ah hian Pu Abraham Beirazi Khithie, PD DRDA leh Pu Collin Hlychho,SDC ten resource person niin zirtirna an pe.

Vawiin Training-ah hian Siaha district chhunga VC awm zawng zawng atangin Village Level SEDP committee-a Chairman leh Member Secretary te an tel a ni.