728/2022-2023
Aizawl, 1st June, 2022 : DM&R department leh GeoHazards Society tangkawpin vawiin khan ATI Auditorium, MINECO-ah ‘Revisiting the Aizawl Scenario- a workshop to improve disaster resilience in Aizawl-and beyond’ tih thupui hmangin zirhona hun an buatsaih a, DM&R Minister Pu Lalchamliana chuan khuallian niin a hmanpui a, National Disaster Management Authority (NDMA) member Pu Krishna S. Vatsa chu khualzahawm a ni.

Workshop hawnna ah hian khuallian Pu Lalchamliana chuan thu sawiin, Hunthar Veng, Aizawl-a lei tlahniam veng tura NDMA in sum an ruahman sak avangin lawmthu a sawi a, he lei tlahniam hian National Highway a hnawh pin thin avangin Mizoram pumin harsatna kan tawh phah thin a, tunah erawh chuan hetiang harsatna hi kan tawk tawh lova, hna pawh thawh zawh tep a ni tawh a ti a. Mizoram chu lirnghing leh leimin awm duhna hmun tehna ah pawh a hlauhawm lai ber seismic Zone-V a awm a nih avangin Mizoram sawrkarin a ngai pawimawh em em a, district hrang hranga zirchian hnuah leimin duhna lai hmun hlauhthawnawm te a chhinchhiah a, heng atan hian cheng vaibelchhe 351.22 hu project 17 lai siamin NDMA ah an thehlut tawh tih a sawi a, lo ngai pawimawh a a theih ang anga bawhzui sak turin NDMA member Pu Krishna S. Vatsa hi a ngen nghal a ni.

Pu Lalchamliana chuan lirnghing leh leimin laka kan invenhimna tur leh kan inbuatsaih lawkna kawngah sawrkar department hrang hrangte, mithiam bikte, NGO te kan tanho a thawhhona tha tak kan neih reng hi a pawimawh a ni, a ti a. 15th Finance Commission (2021-2026) in chhiat rupna thleng thei laka inven a rawn ngai pawimawh lehzual chu lawmawm a tih thu sawiin hun hmasa lama awm ngai lo Mitigation leh Preparedness & Capacity Building atana sum a hranpa a an dah chuan chhiatrupna hmachhawn tura inbuatsaihna kawngah nasa takin hma min sawn tir ngei ka ring a ni, a ti.

Khualzahawm Pu Krishna S. Vatsa, NDMA member pawhin thusawina hun hmangin tlang rama khawpuite hi tunhnai kum 30 chhung hian an than dan a inang tlang hle a, in sak dan leh kawngpui sial dante hi a inang deuh vek a, in sak dan him lo a tam avangin a thlamuanthlak loh hle a, heng vang hian urban planning mumal leh awmze nei taka huai taka kan kalpui ngam a ngai tawh a ni, a ti a. Mithiam bik (expert) te leh scientist te chhawr tangkai tura sawrkar pawh a inher rem ve zel thin a pawimawh thu sawiin State Disaster Management Authority (SDMA) leh Disaster Management & Rehabilitation (DM&R) department ten thawhhona tha an neih a pawimawh thu a sawi bawk.

Pu Krishna S. Vatsa hian 15th Finance Commission hnuaiah tlang ram state (hilly state) ten lirnghing leh leimin laka invenna bakah fire services (kangthelh) tihchangtlunna tur special allocation a awm thu sawiin Mizoram pawhin chhawr tangkai se a duh thu a sawi a, heng bakah hian chhiatrupna laka invenna ngaih pawimawh lehzual a nih avanga tanpuina hrang hrang a awm belh thu a sawi bawk a ni.

Kum 2013 khan Department of Disaster Management and Rehabilitation (DM&R) Department, GeoHazards Society leh GeoHazards International tang tlangin Aizawl khawpui lirnghing 7.0 richter scale in a nuai palh a chhiatna thlen dan tur an lo zirchiang tawh a, hetah hian khawvel pum huapa mithiam engemawzat telin lirngingin in a tihchhiat dan turte, tui leh kawlphetha a ngawng dan turte, kawngpui a tihchhiat dan turte, damdawi in leh zirna in a tihchhiat dan turte, mipui mimir a nghawng dan turte uluk takin an zir a, hetiang chhiatrupna a lo thlena chet lak dan turte an zirchiang bawk a, he an zirchianna hi vawiin workshop-ah hian uluk taka sawiho a ni.

Vawiin Workshop hawnna inkhawm hi DM&R Director Pu Benjamin Lalzama’n a kaihruai a, Pu Hari Kumar, GeoHazards Society of India in powerpoint presentation hmangin “7M Earthquake in Aizawl” a sawifiah a, AMC Commissioner Pu Zothanmawia’n AMC in chhiatrupna thleng thei venna tura hma an lakdan sawifiahna hun a hmang bawk a ni.