Vawiin chawhma dar 11:00 khan District Institute of Education & Training, Serchhip chuan kum 2014-2015 session atana In-service Diploma in Teacher’s Education (D.T.Ed) Training tur Primary leh Middle School zirtirtute tan Induction Programme a buatsaih a, Pi Laldawngliani Chawngthu, Joint Director, SCERT chuan khuallian niin a hmanpui.

Khuallian Pi Laldawngliani Chawngthu chuan Right to Education Act hnuaiah trained teacher nih vek a ngaih tawh thu leh Sawrkar laipui pawhin a duhkhirh thu a sawi a, Mizoram dinhmun thlirin zirtirtute training tir vek chungchanga harsatna tam tak a awm thei dawna an hriat avanga hotute hnungzuia sawrkar laipui an dawr thin chung pawh a Sawrkar Laipui khauh tlat thu leh kum 2015 hnu lamah chuan untrained teacher te hlawh rawn pek an tum tawh loh bur avangin Mizoram sawrkar pawhin kawng hrang hrang a dap a ni a ti a, IGNOU nen tangkawpa zirtirtute training pek ni mahse IGNOU kalphungah SSA Teacher te chu Class XII exam-a 45% hmu chin bak training pek theih an nih loh avangin harsatna nasa tak an tawk ani a ti a, hetih mek lai hian DRC/Mini-DIET te Sawrkarin DIET puitlinga a hlan kai tak hlauh avangin IGNOU a training ve theilote tan kawng a inhawng ta a ni tih sawiin Trainee te chu an vanneihzia hria a thahnemngai turin a chah a ni.

Khuallian hian Education pawimawhzia sawiin Zirtirtute chu rintlak leh thutaka innghat zirtirna chauh naupangte hnena pe turin a fuih a, an thil zirtir chu a practical tawk tur anih bakah khawvelin a mamawhna ang zel hmachhawn thiam thei tura naupangte an insiamrem theih nan zirtirna pek uluk a tula, khawvel inher ruala zirtirna pe thiam thei tura anmahni pawh up-to-date taka awm tura inzir peih turin a chah bawk a, value guidance, moral education leh environment education etc. te hi zirlaibu a hranpa in siam nilo mahse Zirlaibu awmsa te hian a keng tel vek ani tih hria a naupangte hnena zirtir thiam a pawimawh thu a sawi bawk. Kum thar atang chuan Mizoram pumpuiah Class I atanga Class IV tan NCERT text book hmang turin SCERT in tan a lak mek thu sawiin Mizo Medium School te hman tur zirlaibu pawh Mizo tawngin an letling mek tih a sawi bawk a ni.

Diploma in Teachers’ Education (D.T.Ed) Training Programme hi zirtirtu tanglai la trained si lo te tan buatsaih a ni a, tun session ah hian Seat 100 awmin tunah hian training turin Serchhip District chhunga Primary leh Middle School zirtirtu 59 in admission an tifel tawh a, naktuk (July ni 9, 2014) atang Class tan ani ang a, regular taka class hi neih tur niin kumtawp exam leh Diploma Certificate la turin attendance 75% neih a ngai dawn a ni. District dang anglo takin Serchhip a D.T.Ed Training te hi Computer thiam tir vek tum niin an zirlai ah CCC course telh ani dawn a ni.

DIET, Serchhip hi April ni 22, 2006 a bul tan niin tun dinhmunah hian Principal 1, Lecturer 10 leh non-teaching staff 9 an awm mek a; kum 2008 atang khan IGNOU Programme Study Centre hawn niin tun dinhmunah IGNOU Centre ah hian zirtirtu training lai 100 an nei mek bawk a ni.

Vawiin D.T.Ed Training tur te Induction programme hi Pu Lalrammawia, Principal, DIET in a kaihruai a, Pi Amy Lalrinmawii, Lecturer, DIET in zirlai kalpui dan tur kalphung a sawifiah a, Pu Zohmingthanga, DEO, Serchhip leh Pu C. Lalthanzira, DPC, SSA, Serchhip District ten fuihna thu an sawi bawk a ni.