IGAR (East) hnuaia awm Khatla-a hmunpui nei HQ 23 Sector Assam Rifles chuan April thla khan Mizo zirlai naupangte tan Sipai officer-a an luh dan kawng hrang hrang chungchangah inhrilhhriatna leh fuihna programme ‘Awareness Programme cum Coaching Session’ an buatsaih a. Hemi chhunzawmna atan hian tunhnai khan zirlai 14, mipa 10 leh hmeichhia 4 te tan Sipai Officer interview – Services Selection Board (SSB) kalphung, hemi atana hriattur pawimawhte, Communication Skills leh sap tawng hman dan chungchangah a thlawnin coaching chipchiar takin an buatsaih leh a ni.

He Coaching chhimtu Malsawmtluanga chuan an chhungkaw dinhmun ngaihtuahin man neiin hetiang coaching hi a kal thei dawn loh thusawiin a thlawna coaching Assam Rifles ten an buatsaih chu a tan Pathian malsawmna a ni, a ti. Chhimtu dang Lalrinzuali chuan he thil hi atan chuan sipai officer a luh tumna kawnga puitu leh kawng kawhhmuhtu tha nia a ngaih thu sawiin hetiang programme hi a khat tawkin buatsaih thin nise a ti bawk.