“Zirlai pass mai ni lovin, zirlai thiam a pawimawh. Chutilo lehkhathiam hna hmu tlaklo ah chhuah a hlauhawm a. Chutihrualin zir chhoh zelna tur kawng thlan fimkhur a ngai thung,” Minister Pu John Rotluangliana’n a ti. He thu hi vawiina Lengpui MSU (Sub Hq)-ten zirlai tithate chawimawina leh kum 2014-2015 chhunga hruaitu tur thlanna LAD Park-a an neihah a sawi a ni.

Minister chuan zirlai tithate chu hmathlir tha leh felfai tak nei turin a chah a. An zir zawm zelna tur line thlan fuh a pawimawh thu hrilhin, eng pawh zir se, taimak leh rinawm a pawimawh hmasak thu a sawi a. Tumruh leh ngaihven peihte tan chuan Mizoram chhung bakah India ram chhung leh ram pawn thlengin hna a awm zel thu a tarlang bawk.

Vawiin hunah hian Lengpui biala HSLC chin zirlai tithate hnenah chawimawina certificate hlan an ni a. HSLC pass mi 14, HSSLC pass mi 10 leh BA pass mi 4 hnenah certificate hi hlan a ni a. Lengpui MSU (sub Hq) hruaitu inthlanna hi MSU General Hq. atangin an hruaitu thenkhatin hmanpui bawk a ni.