“Mizo society-ah hian hmeichhia tan chuan an tum phawt chuan kawng engkim hi a inhawng vek a, hei hi Mizo hmeichhiate vanneih bikna a ni,” tiin FCS&CA Minister Pu John Rotluangliana chuan vawiina MHIP Day Lengpui Community Hall-a a hmanpui naah a sawi.

Minister chuan khawtlang leh chhungkua a hmeichhiate dinhmun hi a pawimawh hle a, hna hmuh leh zirlai tih that kawngah pawh hmeichhe tam tak chu mipa ten an tluk tawhlo a ni, a ti a. Chutihrualin fanau leh chhungkaw engkawl kawngah mawhphurhna lian tak an neih chu tha taka hlenchhuak turin leh, khawtlang leh kohhranah pawh inhman chin tawk hre turin Minister chuan kalkhawmte chu a chah a ni.

Vawiin MHIP Day lawmna ah hian FCS&CA Minister chuan eirawngbawl gas harsatna sukiang tura Sorkarin hma a lak thu te sawilangin, Sorkar laipuia Petroleum & Natural Gas Minister hnena ziaka Mizoram harsatna te a thlen thu a sawi a. Eirawngbawl gas hralh leh semchhuah hi gas company leh dealer-te inkar chauh a nih thu leh, mipui khamkhawp a lo thlen theih tak lovah chuan Sorkarin mipui laka a mawhphurhna hlenchhuak tura hma a lak thu Minister hian a sawi a ni.

Ni 4 July, 2014-a Delhi khawpuia “Conference of Ministers and Secretaries of Consumer Affairs, Food and Public Distribution of States/ UTs” neih takah Minister Pu John Rotluangliana chuan Mizorama gas a black-a hralh awm chungchang te, FCI atanga buhfai hmuh zat pun mamawh thu leh October thlaa rel kawng dan a nih dawn avanga buhfai leh chakkhai mamawh dangte lakluh dan kawng dang zawn thu te a thlen a ni.